रसुवामा डेढ करोड रुपैयाँ बराबरको रक्सी, चुरोटलगायत सामग्री बेवारिसे अवस्थामा फेला परेको प्रहरीले जनाएको छ।
सशस्त्र प्रहरी बल नेपाल बिओपी टिमुरेले बिहीबार उक्त सामान बरामद गरेको हो। भन्सार छलेर सीमा इलाकाको अस्थायी ड्राइपोर्टमा राखिएको अवस्थामा फेला परेको प्रहरीले जनाएको हो।
अवैध रूपले चोरीपैठारी गरी महंगा मदिरा, चुरोटलगायत सामग्री ल्याएको गोप्य सूचनापछि प्रहरी निरीक्षक नारायण गुरूङ कमाण्डको संयुक्त टोली खटिएको थियो।
सशस्त्र प्रहरीले उक्त सामान बरामद गरे पनि ल्याउने व्यक्ति खुलेको छैन।
बरामद सामान आवश्यक कारबाहीको लागि भन्सार कार्यालय टिमुरेमा बुझाइएको सशस्त्र प्रहरी बलले जनाएको छ।
निर्वाचनको मौका छोपी हुन सक्ने अवैध क्रियाकलाप रोक्न उत्तरी सीमा नाकामा समेत सशस्त्र प्रहरी बल नेपालले विशेष निगरानी गरिरहेको जनाएको छ।
