काठमाडौंमा क्लब र डिस्को बिहान ४ बजेसम्म मात्रै सञ्चालन गर्न पाइने भएको छ।
काठमाडौंका प्रमुख जिल्ला अधिकारीको अध्यक्षतामा मंगलबार बसेको सुरक्षा समितिको बैठकले रात्रिकालीन व्यवसायलाई समय तोकेको हो।
यस्ता व्यवसायलाई थप सुरक्षित, मर्यादित र व्यवस्थित गर्न समय तोकेको जिल्ला प्रहरी परिसर काठमाडौंले जनाएको छ।
त्यस निर्णय अनुसार मदिरा पसलहरू राति १० बजेसम्ममात्रै सञ्चालन गर्न पाइने छन्।
रेष्टुरेन्टहरू मध्यराति १२ बजेसम्म, डान्स दोहोरी रेष्टुरेन्ट र लाउन्ज एण्ड बारहरू २ बजेसम्म र क्लब र डिस्को बिहान ४ बजेसम्म सञ्चालन गर्न पाउने निर्णय भएको हो।
परिसरका एसएसपी भरत बोहराका अनुसार पहिले पनि यही समयअनुसार सञ्चालन गरिन्थ्यो। तर लिपिबद्ध रूपमा निर्णय भइनसकेको हुँदा अहिले निर्णय गरिएको बताए।