सडक डिभिजन कार्यालय दाङले पुस ५ गतेभित्र पूर्व-पश्चिम राजमार्ग अन्तर्गत दाङ खण्डमा सडक मिचेर बनाएका संरचना हटाउन आग्रह गरेको छ।
मंगलबारदेखि लागू हुने गरी १५ दिने सूचना जारी गर्दै दाङ खण्डको धानखोलादेखि शिवखोलासम्मको सडक क्षेत्र दायाँ-बायाँ ३१/ ३१ मिटरभित्र रहेका संरचना हटाउन कार्यालयका सूचना अधिकारी रिकेश महर्जनले निर्देशन दिएका छन्।
तोकिएको समयमा त्यस्ता संरचना नहटाए सडक डिभिजन कार्यालयले आफैं हटाउने र हटाउन लागेको खर्च सडक मिच्ने व्यक्ति वा संघ सरकारी बाँकी सरह असुल उपर गरिने जारी सूचनामा उल्लेख छ।
एमसिसी परियोजनाले पूर्व-पश्चिम राजमार्ग अन्तर्गतको यो सडक खण्ड चार लेनमा विस्तार गर्ने योजना छ।
दाङ सडकखण्ड करिब ७७ किलोमिटर रहेको छ।
सडक डिभिजन कार्यालयले पूर्व-पश्चिम राजमार्गमा पर्ने राप्ती र गढवा गाउँपालिकासहित लमही नगरपालिकालाई पत्राचार गरी वडाको सूचना पार्टीमा सूचना टाँस गर्न आग्रह गरिसकेको छ।