नेपालको पहिलो ‘फ्लाइओभर’ (ओभर पास) को निर्माण आगामी शुक्रबारदेखि सुरू हुने भएको छ।
ललितपुरको ग्वार्को चोकमा बन्ने फ्लाइओभर निर्माणको काम १४ महिनाभित्र सक्ने लक्ष्य छ।
आयोजनाको ठेक्का पाएको आरसी, समानान्तर र रेलिग्रेले शुक्रबारदेखि फ्लाइओभर निर्माण सुरू गर्न लागेको सडक विभागका महानिर्देशक अर्जुनजंग थापाले बताए।
फ्लाइओभर निर्माणका लागि डिजाइन लगायतका अन्य आवश्यक पूर्वतयारी भइसकेको छ।
चक्रपथ विस्तार आयोजनाअन्तर्गत विस्तारित सडक खण्डमा कोटेश्वरदेखि कलंकीसम्म जाम हुने तीन क्षेत्रमा फ्लाइओभर निर्माण गरिने छ। जसअन्तर्गत ग्वार्को चोकमा पहिलो फ्लाइओभर निर्माण हुन लागेको हो।
६ मिटर उचाइ हुने फ्लाइओभर अन्तर्राष्ट्रिय मापदण्डअनुसार निर्माण गरिनेछ।
कुल ४५५ मिटरको लम्बाइ हुने फ्लाइओभरमा ग्राउण्ड क्लियरेन्स ६ मिटर हुनेछ भने फ्लाइओभरमा सवारी साधन चढ्नका लागि १८० मिटर दाँयातर्फ र ११० मिटर बाँयातर्फ र्याम्प निर्माण गरिनेछ।
सुरूमा त्यहाँ ब्यारेकेडहरू राखेर काम सुरू गरिनेछ। खन्ने लगायतका काम गर्न भने अझै समय लाग्ने सडक विभागका अध्ययन तथा अनुसन्धान शाखाका सिडिई सौरभ बज्राचार्यले बताए।
काठमाडौंको धेरै सवारी जाम हुने क्षेत्रमध्ये ग्वार्को पनि एक हो।
ललितपुरको ग्वार्को चोकमा देखिएको ट्राफिक जाम। तस्बिरः निशा भण्डारी/सेतोपाटीफ्लाईओभर निर्माणको काम सुरू भएसँगै यहाँको ट्राफिक व्यवस्थापन अझ चुनौतीपूर्ण हुनेछ।
यो क्षेत्रमा पिक आवरमा ग्वार्कोबाट कोटेश्वरतर्फ जान बिहान ९ देखि ११ बजेसम्म एक मिनेटमा ४३ वटा मोटरसाइकल र २१ वटा चारपाङ्ग्रे चल्छन्। यस्तै साँझ ४ बजेदेखि ६ बजेसम्म ४९ वटा मोटरसाइकल र २० वटा कार एक मिनेटमा पास हुन्छन्।
यस्तै कोटेश्वरबाट ग्वार्कोतर्फ आउने बिहान ९ बजेदेखि ११ बजेसम्म ५४ वटा मोटरसाइकल र साँझ ४ बजेदेखि ६ बजेसम्म ५० वटा मोटरसाइकल र २२ वटा चारपाङ्ग्रे एक मिनेटमा पास हुँदै आएका छन्।
त्यसको व्यवस्थापनका लागि काठमाडौं उपत्यका ट्राफिक प्रहरी कार्यालयले सूचना जारी गरेरेर सवारी डाइभर्सन गर्न भनेको छ।
निर्माणको काम सम्पन्न नभएसम्म कोटेश्वरबाट सातदोबाटो जाने यात्रुबाहक, मालबाहक तथा दुई पाङ्ग्रे सवारी साधनलाई सर्भिस लेनमा र साना चार पाङ्ग्रे सवारी साधनलाई फास्ट ट्र्याकबाट चलाउने योजना ट्राफिक प्रहरी कार्यालयको छ।
कोटेश्वरबाट सातदोबाटोतर्फ जाने र आउने सम्पूर्ण सवारी साधनलाई ग्वार्को चोकभन्दा ६ सय मिटर अगाडि र पछाडि सर्भिस लेन हुँदै चलाउने तयारी छ।
बल्खुबाट सातदोबाटो हुँदै कोटेश्वरतर्फ जाने यात्रुबाहक, मालबाहक तथा दुई पाङ्ग्रे सवारी साधनलाई बल्खुबाट सर्भिस लेनमा र साना चारपाङ्ग्रे सवारी साधनलाई फास्ट ट्र्याकबाट सञ्चालन गरिने कार्यालयको तयारी छ।
यो क्षेत्रमा कसरी जाम कम गर्ने भन्ने बारेमा हामीले पूर्व ट्राफिक प्रहरी निरीक्षक सिताराम हाथेछुलाई सोधेका छौ। उनले यसका लागि १५ वटा आधार दिएका छन्।
यी हुन् ग्वार्कोमा सवारी जाम कम हुने १५ आधारहरू:
१) कलंकीबाट बल्खु, सातदोबाटो, ग्वार्को, कोटेश्वर आउने रात्रि बसलाई कलंकी-बसपार्क-चाबहिल-गौशालाहुँदै कोटेश्वरतर्फ आउन दिने।
२) कोटेश्वरबाट ग्वार्को-सातदोबाटो-बल्खुहुँदै कलंकी जाने रात्रि बसलाई कोटेश्वर-चाबहिल-बसपार्क भएर कलंकीतर्फ जान दिने।
३) चाबहिल, गौशाला, बनेपा, भक्तपुरबाट छुट्ने रात्रि बसहरू ग्वार्को-सातदोबाटो बाटो प्रयोग गर्न नदिई-महाराजगंज-बसपार्क हुँदै कलंकी तर्फ पठाउने।
४) कलंकीबाट बल्खु, सातदोबाटो, ग्वार्को, कोटेश्वर आउने मालवाहक सवारी साधनलाई-कलंकी-बसपार्क-चाबहिल-गौशाला-हुँदै कोटेश्वरतर्फ आउन दिने।
६) कोटेश्वरबाट ग्वार्को-सातदोबाटो-बल्खुहुँदै कलंकी जाने मालबाहक सवारीलाई कोटेश्वर - चाबहिल - बसपार्कहुँदै कलंकीतर्फ जान दिने।
७) चाबहिल क्षेत्रमा धेरै ट्राफिक जाम भयो भने मालवाहक सवारी साधनलाई ओभर ब्रिज नबनेसम्मको लागि मात्र राति ८ बजेदेखि बिहान ८ बजेसम्म कलंकीबाट सातदोबाटो, ग्वार्को हुँदै कोटेश्वरतर्फ जान र आउन दिने।
८) यु.एन. पार्क नजिकको ललितपुर र काठमाडौं जोड्ने पुल साँघुरो भई धेरै ट्राफिक जाम भईरहेको र झन ग्वार्कोले गर्दा ट्राफिक जाम अत्यधिक हुने भएकोले त्यस ठाँउमा बेलीब्रिज बनाई एउटा पुलबाट आउने र अर्को पुलबाट जाने गर्न सकिन्छ।
९) काठमाडौंमा जस्तै ललितपुरको नाकामा पनि बालकुमारी मनोहरा पुलमुनी बाटो बनाउनुपर्छ।
१०) कोटेश्वरतर्फबाट आएको सवारी साधन बालकुमारी मनोहरा पुल क्रस गरी ललितपुरको करिडोरतर्फ जान दिनुपर्दछ। त्यहाँ राखिएको अस्थाई सिमेन्टको बेरिकेट्स हटाउनुपर्छ।
११) सबैभन्दा छेउको बाटो (सर्भिस ट्र्याक) भन्दा उताकोलाई ‘वानवे’ गर्नुपर्छ। बालकुमारी मनोहरा पुलबाट ग्वार्को हुँदै सातदोबाटोतर्फ जाने बनाउने। यस्तै सातदोबाटोबाट ग्वार्को-बालकुमारी हुँदै मनोहरा पुलतर्फ जाने बनाउने।
१२) मंगलबजारबाट ग्वार्कोहुँदै कोटेश्वरतर्फ जाने दुई पाङग्रे र चार पाङ्ग्रे सवारी साधनलाई वडा नं. ७ कार्यालय अगाडि पिलाछेँ-बालकुमारीहुँदै कोटेश्वर तर्फ जान दिने।
१३) लगनखेलबाट इमाडोलतर्फ चल्ने सार्वजनिक मिनिबसहरू सातदोबाटो हुँदै प्रयोग गर्न दिने। इमाडोलतर्फ बाट ग्वार्को हुँदै सातदोबाटो जाने सवारीसाधनलाई हरिसिद्धि-हातिवनतर्फबाट सातदोबाटो भएर पठाउने।
१४) इमाडोलबाट भक्तपुरतर्फ जाने सवारी साधनलाई ग्वार्कोको बाटो प्रयोग गर्न नदिएर बालकोट हुँदै भक्तपुर पठाउने।
१५) फ्लाई ओभर ब्रिज निर्माणमा ठूला कार्य बेलुका ८ बजे देखि बिहान ८ बजेसम्म गर्ने र साना कामहरू मात्र दिउँसो गर्ने।
हेर्नुहोस् निर्माण कार्य सुरू नहुँदै भएका सवारी जामका तस्बिर:
सबै तस्बिरहरूः निशा भण्डारी/सेतोपाटी
1670378675.jpg)
