भारतीय क्रिकेट बोर्डसँग जारी विवादमा पाकिस्तान क्रिकेट बोर्ड (पिसिबी)ले आफ्नो मुद्धा हारेको छ। सम्झौता अनुसार बिसिसिआइले सर्तहरूको पालना नगरेको भन्दै उसले अन्तराष्ट्रिय क्रिकेट काउन्सिलमा उजुरी गरेको थियो। सो मुद्दा हारेपछि उसले १६ लाख डलर जरिवाना तिर्नुपरेको हो।
पिसीबीले बिसिसिआइले ऊसँग भएको सम्झौताको सम्मान नगरेको मामिलामा उजुरी दर्ता गरेको थियो। सो सम्झौता अनुसार सन् २०१५ देखि सन् २०२३ सम्म भारतले पाकिस्तान विरूद्ध ६ दुई पक्षिय सिरिज खेल्नुपर्ने थियो जसलाई भारतले मानेन।
सो उजुरीमा बिसिसिआइले सरकारले अनुमति नदिएकाले खेल्न नसकेको दाबी गरेको थियो। त्यस्तै सो सम्झौता कानुनीरूपले बाध्यकारी नभएको पनि भारतको दाबी थियो। उसले त्यो बाध्यकारी नभइ एक प्रस्तावमात्र भएको बताएको थियो।
पिसिबीका एहसान मनीले आइसिसीको विवाद समाधान समितिमा मुद्धा हारेपछि सो रकम तिरेको स्वीकार गरे।
'हामीले मुआब्जा स्वरूप लगभग २२ लाख डलर खर्च गर्यौं, सो रकम हामीले गुमायौं', उनले भने।
यो रकम भारतलाई तिरेको रकमसहित यात्रा र कानुनी सेवा अन्तरगत भएको बताए। गत वर्ष पिसिबीले बिसिसिआइले करिब ७ करोड अमेरीकी डलर तिर्नुपर्ने दाबीसहित विवाद समाधान समितिमा मुद्धा दायर गरेको थियो।