तस्बिरमा हेर्नुहोस् सिंगापुरविरूद्ध नेपालको विशाल जित

सेतोपाटी संवाददाता

काठमाडौं, चैत २९

मलेसियामा शुक्रबारदेखि सुरु आईसीसी एसिया अन्डर-१९ विश्वकप छनोट प्रतियोगिता अन्तर्गत सिंगापुरविरूद्ध सानदार ९५ रनको पारी खेलेका कप्तान रोहित कुमार पौडेल। तस्बिरः रमन सिवाकोटी

मलेसियामा शुक्रबारदेखि सुरु आईसीसी एसिया अन्डर-१९ विश्वकप छनोट प्रतियोगिता अन्तर्गत सिंगापुरलाई सहजै हराउँदै नेपालले विजयी सुरुवात गरेको छ।

पहिले ब्याटिंग गर्दै नेपालले २८२ रन बनाएपछि लक्ष्य पछ्याउने क्रममा सिंगापुर ३१ ओभरमा ६५ रनमै समेटिन पुग्यो र नेपालले २१७ रनको विशाल जित दर्ता गर्‍यो।

नेपालले दिएको २८३ रनको लक्ष्य पछ्याउने क्रममा सिंगापुरले सुरुवात देखि लगातार विकेट गुमाउन पुग्यो। नेपाली स्पिनरहरुको अगाडि सिंगापुरे ब्याट्सम्यानहरुले खुलेर खेल्न सकेनन्।

पहिलो ४ विकेट २९ रनमै गुमाएपछि पाँचौ नम्बरमा ब्याटिंङ गरेका इशान सावने ५४ बलमा ४ चौका र १ छक्का मदतले २८ रन बनाए। त्यसपछि सिंगापुरले ३१ ओभरमा ६५ रनमा सम्पूर्ण विकेट गुमाउन पुग्यो।

२ जना बाहेक अन्य सिंगापुर ब्याट्सम्यानहरुले दोहोरो अंकमा रन बनाउन सकेनन् जसमध्ये ४ जना ब्याट्सम्यानले खाता समेत खोलेनन्।

सिंगापुरलाई सस्तैमा रोक्न नेपालका लागि अफ स्पिनर पवन सर्राफले सर्वाधिक ३ विकेट लिए। ६ ओभरमा ५ मेडन राख्दै मात्र ५ रन खर्चिएका उनी म्यान अफ दी म्याचसमेत भए।

यस्तै देब्रे हाते स्पिनरद्वय कुशल मल्ल ( ८-३-१७-२ ) र सुर्य तामाङ ( ७-२-१५-२ ) ले २/२ विकेट लिए। तिब्र गति बलर राशिद खानले १ विकेट ( ३-१-७-१) लिए।

सिंगापुरविरूद्धको जितसँगै नेपालले महत्वपूर्ण २ अंक बटुलेको छ। नेपालले दोस्रो खेलमा भोलि शनिबार युएईसँग प्रतिस्पर्धा गर्दैछ। खेल नेपाली समय ७:४५ बजे बिहान सुरु हुनेछ।

नेपाल लगायत आयोजक मलेसिया, कुवेत, ओमान, सिंगापुर र युएई गरि ६ टोलि सहभागी प्रतियोगिताको विजेता टिम सन् २०२० जनवरी/फेब्रुवरीमा दक्षिण अफ्रीकामा आयोजना हुने यु-१९ विश्वकप खेल्न छनौट हुनेछ।

हेर्नुहोस् तस्बिरमा