इण्डियन प्रिमियर लिगमा चेन्नई सुपर किङ्सको जितको सिलसिला रोकिएको छ।
बुधबार सनराइजर्स हैदराबादसँग सजिलै ६ विकेटले हारेपछि उसको जितको सिलसिला रोकिएको हो। यस खेलमा चेन्नई नियमित कप्तान महेन्द्र सिंह धोनीबिना नै मैदानमा उत्रेको थियो । कम्मरमा पीडा भएका कारण धोनीले हिजोको खेल नखेलेका हुन्।
उनको अनुपस्थितिमा चेन्नईले निर्धारित ओभरमा ५ विकेटको क्षतिमा १३२ रनमात्र बनाउन सक्यो। १३३ रनको सजिलो लक्ष्यलाई हैदराबादले १६.५ ओभरमा पूरा गर्यो।
चेन्नई यसअघिका ४ म्याचमा लगातार विजयी हुँदै आएको थियो। चेन्नईलाई हराएसँगै हैदराबाद ८ अंक बटुलेर लिग तालिकाको पाँचौ नम्बरमा पुगेको छ। उसले यसअघि लगातार ३ म्याच हारेको थियो।
हिजोको खेलमा चेन्नईले टस जितेर पहिलो ब्याटिङ गर्ने निर्णय गरेको थियो। उसका लागि ओप्नर फाफ डु फ्लेसिस र शेन वाटसनले क्रमशः ४५ र ३१ रन बनाउँदै पहिलो विकेटका लागि ७९ रनको साझेदारी गर्दै राम्रो सुरूवात दिलाएका थिए।
तर टोलीले यस सुरूवातको फाइदा उठाउन सकेन। त्यसपछि उसका ब्याट्सम्यान रन बनाउन संघर्षरतः देखिए। सुरेश रैना १३ रन बनाएर आउट हुँदा केदार जाधव मात्र १ रन तथा स्याम बिलिंग्स शून्यमा आउट भए। अंबाती रायडुले २५ र रवीन्द्र जडेजाले १० रन बनाएर टोलीलाई १३० रनको स्कोरमा पुर्याए।
जडेजाले २० बलमा १० रन जोडेका हुन्। हैदराबादका लागि राशिद खानले २ विकेट लिए भने खलील अहमद, विजय शंकर र शाहबाजले समान १-१ विकेट लिए।
त्यसपछि १३३ रनको लक्ष्य पछ्याउन आएको हैदराबादलाई उसका ओप्नरहरू डेविड वार्नर र जोनी बेयरस्टोले राम्रो सुरूवात दिलाए।
यी दुईले ५.४ ओभरको समाप्तीमा टोलीका लागि ६६ रन जोडिदिए। यस स्कोरमा वार्नर आउट भए। आउट हुँदा उनले आफ्नो अर्धशतक पूरा गरिसकेका थिए। उनले २५ बलमा ५० रन जोडे।
त्यसपछि चेन्नईले केन विलियम्सन तथा विजय शंकरलाई ३ तथा ७ रनमा पेभेलियन फर्काए। क्रिजमै रहेका बेयरस्टोले त्यसपछि दीपक हुड्डासँग मिलेर टोलीलाई १३१ रनमा पुर्याए। ततःपश्चात उनले छक्का प्रहार गर्दै टोलीलाई जित दिलाए। उनले कुल ६१ रन जोडे। दीपकले १३ रनको योगदान दिए।
चेन्नईका लागि इमरान ताहिरले २ तथा दीपक चाहर र कर्ण शर्माले १-१ विकेट लिए।