दुई दिन अगाडी इङ्ल्याण्ड विश्वकपका लागि घोषणा भएको टोलीको नामावलीबाट सबैभन्दा बढी निराश ऋषभ पंत र अम्बाती रायडु भए।
दुबैलाई विश्वकपका लागि कडा दाबेदार मानिएको थियो तर टोलीको अन्तिम सूचीमा उनीहरूको नाम परेन।
यसबाट निराश उनीहरूका लागि भारतिय क्रिकेट बोर्डको पछिल्लो निर्णयले भने केहि खुशी दिने देखिएको छ। भारतीय क्रिकेट बोर्ड बिसिसिआईले पंत, रायडुसँगै नवदीप सैनीलाई विश्वकपको स्ट्याण्डबाई खेलाडीको सूचिमा राखेपछि यस्तो भएको हो।
अब कुनै भारतिय खेलाडी घाइते भएमा उनीहरूले विश्वकप खेल्न पाउनेछन्। नवदीप सैनी भारतीय टोलीको नेट अभ्यासका लागि भारतीय टोलीसँगै ईङ्ल्याण्ड जानेछन्। उनका अलावा यस कामका लागि दीपक चाहर, खलील अहमद तथा आवेश खान पनि यसमा समावेश छन्।
बिसिसीआईले आफ्नो खर्चमा विश्वकप टोलीसँगै पंत र रायडुलाई ईङ्ल्याण्ड लाने तयारी गरेको भारतीय संचारमाध्यमले जनाएका छन्। टोलीलाई आवश्यकता परेमा तुरून्त उपलब्ध हुन सकुन भनेर बोर्डले विश्वकप टोलीसँगै उनीहरूलाई पनि लाने तयारी गरेको हो।
पंत र रायडु अन्तिम १५ मा नपरेपछि मिश्रित प्रतिक्रिया आएको छ। सुनिल गावस्करले पंत टोलीमा नपरेकोमा निराशा व्यक्त गरेका थिए भने गौतम गम्भीरले रायडु टोलीमा किन नपारिएको हो भनेर प्रश्न गरेका थिए।
टिममा नपरेपछि रायडुले विश्वकप हेर्न थ्रि डी चस्मा किन्न लागेको भन्दै असन्तुष्टि पोखेका थिए।
स्ट्याण्डबाई खेलाडीको सूचिमा बिसिसिआईले पंत र रायडुलाई क्रमशः पहिलो र दोश्रो रोजाइमा राखेको छ। सैनीलाई बलरको सूचिमा राखिएको छ।