विराट कोहलीको रोयल च्यालेन्जर्ससँग १ रनले पराजित भए पनि महेन्द्र सिंह धोनीले आईपिएलको इतिहासमा एउटा कीर्तिमान आफ्नो पक्षमा पारेका छन्।
उनी आईपिएलमा २०० छक्का प्रहार गर्ने पहिलो भारतीय खेलाडी बनेका छन्।
आइतबार भएको खेलमा धोनीले ४८ बलमा ८४ रन बनाएका थिए। यस क्रममा चार चौका तथा ७ छक्का प्रहार गरेका थिए। आईपिएलमा उनको छक्काको संख्या २०३ पुगेको छ।
यस सिजनमा उनले अहिलेसम्म १७ छक्का प्रहार गरिसकेका छन्। यस सूचिमा रोहित शर्मा र सुरेश रैना क्रमश; दोश्रो र तेश्रो स्थानमा रहेका छन्। उनीहरूले हालसम्म समान १९०-१९० छक्का प्रहार गरेका छन्।
आईपिलमा सर्वाधिक छक्काको रेकर्ड भने क्रिस गेलको नाममा छ। उनले हालसम्म ३२३ छक्का प्रहार गरिसकेका छन्।
यस्तै धोनीले यस सिजनको सर्वाधिक लामो छक्का पनि सो म्याचमा प्रहार गरे। उनले हानेको छक्काले १११ मिटर लामो दुरी कायम गरेको छ।