विराट कोहलीको रोयल च्यालेन्जर्सले बुधबार भएको आईपिएल खेलमा किङ्स इलेभेन पंजाबलाई हराएर यस सिजनको प्लेअफलाई रोमाञ्चक बनाएको छ। यस खेलमा बेङ्लोरले ४ विकेटको क्षतिमा पंजाबलाई जितका लागि २०३ रनको लक्ष्य दिएको थियो।
सो विशाल लक्ष्य पछ्याउन मैदानमा उत्रेको पंजाबले एकसमय आफूलाई जिततर्फ बढाइरहेको भएपनि अन्तिम ओभरहरूमा ध्रमाराएपछि ७ विकेटमा १८५ रन मात्र बनाउन सक्यो र बेङ्लोर १७ रनले विजयी भयो।
जारी सिजनमा बेङ्लोरको यो चौथो जित हो। यस जितले उसको प्लेअफमा पुग्ने आशालाई कायमै राखेको छ भने हारले पंजाबको यात्रालाई कठिन बनाएको छ। ११ खेलमा पंजाबको यो छैठौं हार हो।
जितसँगै लिगको अंक तालिकामा बेङ्लोर आठ अंकसहित सातौं नम्बरमा पुगेको छ। पंजाब १० अंकसहित पाँचौ स्थानमा कायम छ।
अब बेङ्लोरले आफ्ना बाँकी ३ खेल जितेमा उसले १४ अंक बटुल्नेछ। यस्तो हुँदा अन्य खेलका नतिजा उसको आवश्यक समिकरण अनुसार आएमा उसको प्लेअफ यात्रा कायम रहनेछ।
यस्तै पंजाबले पनि आफ्ना बाँकी तीनै खेल जितेमा ऊ प्लेअफ पुग्नेछ तर एक म्याच हारेमा उसका लागि प्लेअफ सहज हुनेछैन।
हिजोको खेलमा टस जितेको पंजाबले पहिले बलिङ गर्ने निर्णय गरेपछि बेङ्लोर ब्याटिङमा आएको थियो।
उसका लागि एबी डिविलियर्सले सर्वाधिक नटआउट ८२ रन जोडे। यस्तै मार्कस स्टोइनिसले पनि अविजित ४६ रन जोडे भने पार्थिव पटेलले ४३ रन जोडेका थिए। यस्तै कोहली भने मात्र १३ रनमा आउट भए।
पंजाबका लागि मोहम्मद शमी, मुरूगन आश्विन, रविचन्द्रन आशविन तथा हार्डस विलियनले १-१ विकेट लिए।
२०३ को लक्ष्य पछ्याउन आएको पंजाबका लागि ओपनर केल राहुलले ४२ रन जोड्दा क्रिस गेलले २३ रन जोडे। यस्तै मयंक अग्रवालले ३५ रन जोडे भने निकोलस पूरनले ४६ रनको योगदान दिए।
पूरनको ब्याटिङमा एकसमय जिततर्फ लम्किरहेको जस्तो देखिएको पंजाबलाई बाँकी ३ ओभरमा जितका लागि ३६ रन चाहिएको थियो। आईपिएलको रेकर्ड अनुसार यो सजिलो लक्ष्य थियो तर अन्तिम ओभरमा बेङ्लोरले सटिक बलिङ गर्दै नतिजा आफ्नो पक्षमा पल्टायो। पूरन १९ औं ओभरमा आउट भएपछि पंजाबले खेल गुमायो।
बेंगलोरका लागि उमेश यादवले ३,नन्दीप सैनी २,मार्कस स्टोइनिस र मोइन अलीले १-१ विकेट लिए ।
