जारी इण्डियन प्रिमियर लिगमा शुक्रबार भएको खेलमा महेन्द्र सिंह धोनी बिना मैदानमा उत्रेको चेन्नई सुपर किङ्स मुम्बई इण्डियन्ससँग ४६ रनले पराजित भएको छ।
चेन्नईको घरेलु मैदानमा यो पहिलो हार हो। ज्वरो आएर विरामी भएपछि चेन्नई आफ्नो क्याप्टेन कुल बिना नै मैदानमा उत्रेको थियो।
जितसँगै मुम्बई प्लेअफको नजिक पुगेको छ। जारी सिजनमा सातौं जित दर्ता गरेको मुम्बईले ११ खेलबाट १४ अंक जोडेको छ। अब प्लेअफमा पुग्न उसले बाँकी ३ खेलमा मात्र एकमा जित हासिल गरे पुग्छ।
चेन्नई यसअघि नै प्लेअफ पुगिसकेको छ।
शुक्रबार पहिले ब्याटिङ गरेको मुम्बईले निर्धारित २० ओभरमा ४ विकेट गुमाउँदै १५५ रन जोडेको थियो। १५६ रनको लक्ष्य पछ्याउन मैदानमा उत्रेको चेन्नई १७.४ ओभरमा १०९ रन बनाउँदा अल आउट भयो। घरेलु मैदानमा चेन्नईको यो सबैभन्दा सानो स्कोर हो।
चेन्नईका मुरली विजयीले ३८, मिचेल सन्टनरले २२ तथा डवेन ब्राभोले २० रन जोडेका थिए। यसबाहेक उसका अन्य कुनै पनि ब्याट्सम्यानले दोहोरो अंकमा रन बनाउन सकेनन् ।
हिजोको खेलमा लसिथ मांलिगाले चेन्नईको चार विकेट लिदां कृणाल पाण्डेयले तथा जसप्रित बुमराहले समान दुई विकेट लिए ।
त्यसअघि पहिले ब्याटिङ्ग गरेको मुम्बई लागि कप्तान रोहित शर्माले ६७ र इविन लुइसले ३२ रन बनाउँदा हार्दिक पाण्डेयले नटआउट २३ रन जोडेका थिए ।
चेन्नईका लागि मिचेल स्यटनरले २ तथा इमरान ताहिर र दीपक चाहरले १-१ विकेट लिएका थिए।
यस सिजनमा चेन्नईमाथि मुम्बईको यो दोश्रो जित हो। मुम्बई चेन्नईलाई जारी लिगमा दुबै म्याच हराउने एकमात्र टोली हो।
