आन्द्रे रसेलको अलराउण्ड प्रदर्शनमा कोलकाता नाइट राइडर्सले आइतबार मुम्बई इण्डियन्स विरूद्धको खेलमा ३४ रनको जित हासिल गरेको छ। जितसँगै कोलकाताले प्लेअफ यात्राको आशालाई कायमै राखेको छ।
हिजोको खेलमा मुम्बईलाई पराजित गर्ने क्रममा कोलकाताले शुभमन गिलको ७६ तथा क्रिस लिनको ५४ रन र रसेलको नटआउट ८० रनमा २ विकेट गुमाउँदै २३२ को स्कोर खडा गरेको थियो। जारी सिजनमा यो सर्वोच्च रन स्कोर हो।
त्यसपछि जवाफी ब्याटिङमा आएको मुम्बईका लागि हार्दिक पाड्याले ३४ बलमा विस्फोटक ९१ रन जोडे पनि मुम्बईले सात विकेटको नोक्सानीमा १९८ रन मात्र जोड्न सक्यो र नतिजा कोलकातालाई सुम्पियो। हार्दिक बाहेक मुम्बईका कुनै पनि ब्याट्सम्यान गतिलो प्रदर्शन गर्न सकेनन्। हार्दिकपछि मुम्बईका लागि सूर्यकुमार यादवले सर्वाधिक २६ रन बनाए।
कोलकाताका लागि रसेलले २५ रन दिदैं २ विकेट झार्दा हेरी गुर्नी तथा सुनिल नारायणले क्रमशः २७ र ४४ रन दिदैं समान २-२ विकेट लिए।
यस जितसँगै कोलकाताले १२ खेलबाट ५ मा जित हासिल गर्दै १० अंक जोडेको छ। ऊ लिगको पाँचौ स्थानमा पुगेको छ। त्यस्तै मुम्बई १४ अंकसहित तेश्रो स्थानमा कायम रहेको छ।
