विराट कोहलीको कप्तानीमा रहेको रोयल च्यालेन्जर्स बेङ्लोर जारी आईपिएलको प्लेअफबाट बाहिरिएको छ।
मंगलबार राजस्थान र बेङ्लोरबीचको खेल वर्षातका कारण रद्ध भएपछि ऊ प्लेअफको दौडबाट बाहिरिएको हो।
वर्षाका कारण निर्धारित समय भन्दा ३ घण्टा ढिलो सुरू भएको म्याचमा दुबै टोलीले १-१ अंक बाँडे।हिजोको खेलमा ५ ओभरमा ६३ रनको लक्ष्य पछ्याउनेक्रममा ३.२ ओभरमा १ विकेटमा बेङ्लोरले ४१ रन बनाएको थियो।
अब प्राविधिक रूपमा पनि बेङ्लोरको प्लेअफ खेल्ने सम्भावना सकिएको छ। १३ म्याच खेलिसक्दा ऊ ९ अंकका साथ लिग तालिकाको पुछारमा रहेको छ जबकी ११ अंकसहित राजस्थान पाँचौ स्थानमा रहेको छ।
हिजोको खेलमा सन्जु स्यामसन १३ बलमा २८ रन बनाएर खेलिरहेको अवस्थामा ठूलो पानी परेपछि म्याच रद्ध भएको हो। सो समय राजस्थानलाई १० बलमा २२ रन चाहिएको थियो।
पानी परेपछि ५ ओभरमा छोट्याइएको खेलमा बेङ्लोरको सात विकेट ६२ रनमा झरेको थियो। त्यसपछि अम्पायरहरूले दुई पटक पिचको जाँच गरेपछि ११.२६ बजे पाँच-पाँच ओभरको म्याच गराउने फैसला गरेका थिए।
त्यसपछि पहिलो ब्याटिङमा आएको बेङ्लोरका लागि विराट कोहलीले वरूण आरोनको पहिलो दुई बलमा छक्का जोडे। त्यसपछि डिविलियर्सले दुई चौका हाने । यस ओभरमा २३ बन्यो। दोश्रो ओभरमा कोहलीले गोपाललाई चौका र छक्का हाने तर चौथो बलमा लङ्अन हान्नेक्रममा लिविङ्स्टोनको हातबाट क्याचआउट भए। कोहलीले ११ बलमा २५ रन बनाए। अर्को बलमा डिविलियर्स १० रनमा रियान परागबाट आउट भए।
त्यसैगरी मार्कस स्टोइनिस पनि स्टीव स्मिथबाट क्याचआउट भए। आरसिबीका ३ व्याट्सम्यानले दुई ओभरमा ३५ रनको स्कोरमा पेभेलियन फर्किए। अर्को ३ ओभरमा २७ रन बन्दा चार विकेट झरे। ओशन थमसले दुई विकेट लिदां पराग र जुदेव उनादकटले समान १-१ विकेट लिए।