जारी ईण्डियन प्रिमियर लिग(आईपिएल)को अन्तिम लिग म्याचमा रोयल च्यालेन्जर्स बेङ्लोरले सनराइजर्स हैदराबादलाई ४ विकेटले पराजित गरेको छ।
हारसँगै हैदराबादको ‘प्लेअफ’ यात्रा कठिन बनेको छ। शनिबार सम्पन्न खेलमा हैदराबादले कप्तान केन विलियम्सको अविजित ७० रनको सहयोगमा बेङ्लोरलाई १७६ रनको बलियो लक्ष्य दिएको थियो। सो लक्ष्यलाई बेङ्लोरले ४ बल बाँकी छँदा हासिल गर्यो।
हारसँगै १४ म्याचबाट १४ अंक जोडेको हैदराबादले अब प्लेअफका लागि कोलकाता नाइट राइड्र्सको हारको कामना गर्नुपर्ने भएको छ।
शिमरेन हेटमायेर र गुरकीरत सिंह बेङ्लोरको विजयी बिदाइका नायक बने।
उनीहरू दुबैले टोलीलाई खराब स्थितिबाट निकाल्दै चौथो विकेटका लागि १४४ रनको साझेदारी गरे। हेटमायेरले ४७ बल खेल्दै चार चौका र ८ छक्काको सहयोगमा ७५ रन बनाए भने गुरकीरतले ४८ बलमा ६५ रन बनाए। अन्तिममा यी दुबै ब्यास्म्यान आउट भएपनि उमेश यादवले अविजित ९ रन बनाउँदै बेङ्लोरलाई जित दिलाए।
लक्ष्य पिछा गर्न उत्रेको बेङ्लोरको सुरूवात भने बिर्सनलायक रह्यो। उसले २० रनको कुल स्कोरमा पार्थिव पटेललाई शून्यमा गुमाउँदा विराट कोहली १६ रनमा आउट भए भणे अब्राहम डिविलियर्स मात्र १ रनमा पेभेलियन फर्किए।
जारी सिजनमा बेङ्लोरको यो पाँचौ जित हो। ऊ १० अंकसहित लिगको पुछारमा रहेको छ। हैदराबादका लागि खलिलले ३, भुवनेश्वरले दुई तथा राशिद खानले १ विकेट लिए।
त्यसअघि पहिले ब्याटिङ् गरेको हैदराबाद निर्धारित ओभरमा ७ विकेटको नोक्सानीमा १७५ रनको बलियो स्कोर बनाएको थियो। हैदराबादका लागि कप्तान केन विलियम्सले सर्वाधिक अविजित ७० रन जोडे।
यस्तै मार्टिन गुप्टिलले ३० रन बनाउँदा विजय शंकरले २७ रन जोडे भने ऋद्धिमान शाहाले २० रनको योगदान दिए ।
बेङ्लोरको यस जितले हैदराबादको ‘प्लेअफ’ कठिन बनेको छ। आइतबार कोलकाता र मुम्बईबीचको खेलमा कोलकाता विजयी भएमा हैदराबादको ‘प्लेअफ’ सम्भावना सकिनेछ। यस खेलमा मुम्बईले कोलकातालाई ठूलो रन अन्तरमा पराजित गरेमा रनरेटको आधारमा हैदराबादको ‘प्लेअफ’ यात्रा हुनसक्नेछ। यसमा उसको रनरेट कोलकाताको भन्दा बढि हुनुपर्नेछ।
