इन्डियन प्रिमियर लिग (आइपिएल) को दोस्रो क्वालिफायरमा शुक्रबार राति डिफेन्डिङ च्याम्पियन चेन्नई सुपर किंग्स र पहिलो पटक प्लेअफको कुनै खेल जितेको दिल्ली क्यापिटल्स भिड्दैछन्।
यो खेलमा दिल्ली क्यापिटल्समा आवद्ध नेपाली यूवा लेग स्पिनर सन्दीप लामिछाने प्लेइङ ११ मा पर्छन् की पर्दैनन् भन्ने क्रिकेटप्रेमी आमनेपालीको चासो छ।
यो सिजनमा दिल्लीका खेलमा छिटपुट प्लेइङ ११ मा परेका सन्दीपले अप्रिल २८ मा रोयल च्यालेन्जर्स बैंग्लोरसँग खेलेपछि भने मौका पाएका छैनन। सो खेलमा दिल्ली विजयी भए पनि सन्दीपले तीन ओभरमा ३६ रन खर्चेकाले उनी त्यसपछि प्लेइङ ११ मा नअटाएका हुन्।
चेन्नईमा लिग चरणको तेह्रौं खेलमा सन्दीपलाई नखेलाएकै कारण दिल्ली शीर्ष दुईमा नपुगेको भन्ने धेरै छन्। स्पिनरलाई मद्दत गर्ने पिचमा तीव्र गतिका बलरले खराब प्रदर्शन गरेपछि दिल्लीविरूद्ध चेन्नईले १७९ रन बनाएको थियो। चेन्नईका तीन स्पिनरले कसिलो बलिङ गरेर दिल्लीलाई ९९ रनमै रोकेकाले दिल्ली बराबर खेल जिते पनि रनरेटका आधारमा अंकतालिकामा तेस्रो हुन पुग्यो।
सो खेलमा दिल्लीका तीव्र गतिका बलर ट्रेन्ट बोल्टले ४ ओभरमा ३७ रन दिएका थिए भने क्रिस मोरिसले ४ ओभरमा ४७ रन खर्चेका थिए।
सनराइजर्स हैदरावादसँगको आजकै मैदानमा भएको एलिमिनेटर खेलमा पनि दुबै टोलीका स्पिनरले राम्रो बलिङ गरेका थिए।
दिल्लीका लेग स्पिनर अमित मिश्राले ४ ओभरमा १६ रनमात्र खर्चिएका थिए भने हैदरावादका रसिद खानले ४ ओभरमा १५ रनमात्र दिएका थिए। सो खेलमा दुबै टोलीका तीव्र गतिका बलरले एक ओभरमा लगभग १० रन दिएका थिए भने स्पिनरले भने औसतमा ६ रनमात्र खर्चेका थिए।
बोल्टले सो खेलमा ३ ओभरमा ३७ रन खर्चेर १ विकेट लिएका थिए।
यो पनि पढ्नुस् :
स्पिनरलाई मद्दत गर्ने पिचमा दिल्लीले पनि चेन्नईको जस्तै तीन स्पिनर खेलाएमा लेग स्पिनर सन्दीप लामिछाने टिममा पर्न सक्नेछन्।
चेन्नईका सुरेश रैनाबाहेक सबै ब्याट्सम्यान दायाँहाते भएकाले सन्दीपलाई खेल्न उनीहरूलाई कठिन हुनेछ।
चेन्नईमा भएको लिग खेलमा घरेलु टोलीविरुद्ध दिल्लीमा भारतीय बायाँ हाते बलर जगदीश सुचिथलाई तेस्रो स्पिनरका रूपमा मैदान उतारेको थियो। स्पिनरलाई मद्दत गर्ने उक्त मैदानमा सुचिथले ४ ओभरमा २८ रन खर्चेर २ विकेट हात पारेका थिए।
सुचिथले सो खेलमा राम्रै प्रदर्शन गरे पनि आजको महत्वपूर्ण खेलमा यो सिजनमा एकमात्र खेल खेलेका उनीभन्दा सन्दीप प्रभावकारी हुन सक्ने देखिन्छ। सन्दीपसँग विश्वभरिका टी-२० खेलेको अनुभव छ भने आइपिएलको यो सिजनमा राम्रो प्रदर्शन गर्न नसक्दा पनि ६ खेलमा ८ विकेट लिएका छन्।
स्पिनलाई मद्दत गर्ने पिचमा फिंगर स्पिनरभन्दा लेग स्पिनरले बढी फाइदा लिन सक्ने हुनाले पनि सन्दीप आज सुचिथभन्दा प्रभावकारी हुन सक्छन्। सोही कारणले अक्षर पटेलका रूपमा एउटा बायाँहाते स्पिनर खेलाउने दिल्लीले सुचिथलाई दोस्रो बायाँहाते स्पिनर खेलाउनुभन्दा सन्दीपलाई दोस्रो लेग स्पिनरका रूपमा खेलाउँदा फाइदा हुन सक्छ।
चेन्नईको जस्तै स्पिनरलाई मद्दत गर्ने र बाउन्ड्री पनि ठूलै भएकाले विशाखापटनममा हुने आजको खेलमा मौका पाए सन्दीपले राम्रो बलिङ गर्न सक्छन्।