पाकिस्तानपछि श्रीलंकाले पनि आईसिसीसँग जारी विश्वकपमा इङ्ल्याण्डको क्रिकेट पिच हरियो भएको भन्दै गुनासो गरेको छ।
उसले खराब पिच, अपर्याप्त प्रशिक्षण तथा यातायात सुविधाको खराब व्यस्थापनप्रति असन्तोष प्रकट गरेको छ।
श्रीलंका अघि पाकिस्तानका कप्तान सरफराज अहमदले भारतीय टोलीका हिसाबले मनलाग्दी पिच बनाइएको आरोप लगाएका थिए। उनले पाकिस्तानलाई हरियो पिचमात्रै दिने गरेको गुनासो गरेका थिए। उनले ब्याटस्म्यान र स्पीनरहरलाई सहयोगी हुने राम्रो पिच भारतलाई दिइएको आरोप लगाएका थिए।
श्रीलंकाली टिम व्यवस्थापक असांथा डि मेलले आईसिसीलाई पत्र लेख्दै श्रीलंकाले कार्डिफमा दुईवटा हरियो पिचमा क्रिकेट खेल्नुपरेको गुनासो गरेका छन्। सोहि मैदानमा उसले न्यूजिल्याण्डसँग हार र अफगानिस्तानसँग जितको नतिजा निकालेको थियो।
उनले शनिबार पनि अस्ट्रेलियाविरूद्धको खेलमा हरियो पिचले नै कुरिरहेको बताए। उनले यो उचित नभएको उनको भनाइ छ। उनले आईसिसीले केहि टिमको हिसाबले पिच तयार गरेको आरोप लगाए।
'यस विश्वकपमा शीर्ष १० टोलीले भाग लिइरहेका छन्। मेरो मान्यता के हो भने सबैलाई समान व्यवहार गरिनुपर्छ।। हामीलाई चारै म्याचमा हरियो पिच दिइयो जबकी बाँकी टोलीले राम्रो पिच पाइरहेका छन्', उनले भने।
यससँगै उनले आफ्नो टोलीलाई कम सिट भएको बस दिइएको तर पाकिस्तानलाई 'डबल डेकर' बस दिएकोमा पनि आपत्ति प्रकट गरेका छन्। उनले आफूहरू बसेको होटलमा स्विमिङ् पुलसमेत नभएको गुनासो गरेका छन्।
त्यस्तै कार्डिफमा अभ्यासको पनि राम्रो सुविधा नभएको उनको आरोप छ। उनका अनुसार श्रीलंकाली टोलीलाई ३ नेटको सट्टा २ नेटको मात्र व्यवस्ता गरिएको छ। यसले अभ्यासमा समस्या पारेको उनको भनाइ छ।
