आज आइतबार भारत र पाकिस्तानले एकअर्काको सामना गर्दैछन्। आजको खेलमा भारत पाकिस्तानलाई विश्वकपमा सातौं पटक पराजित गर्ने अठोटमा छ भने पाकिस्तान भारतलाई निराश पार्ने ध्येयमा।
दुबै देशको खेल हेर्न मानिसहरूले टिकटका लागि ६२ हजार भारू सम्म तिरेको खबर यसअघि नै सार्वजनिक भइसकेको छ। यसमा जुवा खेल्नेहरूको जमात झन ठूलो छ।
भारतीय संचारमाध्यमका अनुसार दिल्ली एनसिआरमा मात्र यसको अंक सय करोड भारूमाथि पुगेको अनुमान गरिएको छ। दिल्लीसँग जोडिएका फरीदाबाद, गाजियाबाद, नोएडा तथा गुरूग्राम जस्ता इलाकामा सट्टा कारोवारीको ठूलो र बलियो नेटवर्क रहेको मानिन्छ।
प्रहरी उपायूक्त मधुर वर्माले सट्टा कारोबारीमाथि प्रहरिले कडा निगरानी गरिरहेको बताएका छन्।
'आइतबार भारत-पाकिस्तानबिच हुने म्याचका कारण चलमलाउने सट्टेबाजीमा हाम्रो सुक्ष्म नजर छ। हामीले हरेक कोणबाट त्यसलाई हेरिरहेका छौं। हामी पाँचतारे होटल, गेस्ट हाउस त्यसमा पनि विशेषगरी करोल बाग र पुरानो दिल्लीका इलाकाहरूमा कडा नजर लगाइरहेका छौं किनकी यिनै इलाकामा उनीहरूको ज्यादा गतिविधि हुनेगर्छ। यी सट्टेबाजीहरूको संजाल एकदमै मजबुत हुनेगरेको छ। उनीहरूलाई समात्न धेरै मुश्किल पर्छ तर हामी सक्दो गरिरहेका छौं', वर्माले भने, 'पहिला प्रहरीले उत्तरी दिल्लीबाट यसका केहि ठूला कारोबारीलाई समातेका थियो। उनीहरूसँग सट्टाबाजहरूका फोन जटिल इन्टरनेट सफ्टवेयरमा जोडिएको पाइएको थियो।'
प्रहरीका अनुसार क्रिकेट जुवाको बजारमा भारतको बलियो उपस्थिति छ। म्याचका साथमा १-१ ओभर, १-१ बल, कसले कति रन बनाउँछ, कसले कति विकेट लिन्छ सबै शीर्षकमा जुवा खेलिने गरिएको छ।
'आईपिएलमा जस्तै विश्वकपमा पनि कलेजका विद्यार्थी, व्यवसायी, होलट मालिक, क्रिकेट प्रशंसक, व्यापारी, कर्पोरेटर महिला, हवाला कारोबारी आदि हाम्रो पक्षमा छ, ६० प्रतिशतभन्दा बढि दाउ भारतको जितमा लगाइएको छ' एक सट्टेबाजले बताएका छन्।
त्यसैगरी भारतीय खेलाडीका आधारमा मूल्य तोकिएको छ। उदाहरणका लागि जसप्रीत बुमराहका लागि १५ रूपैयाँ तथा मोहम्मद आमिरका लागि ६ रूपैयाँको भाउ लगाइएको छ।
यसैगरी कसले अर्धशतक बनाउँछ भनेर ब्याटस्म्यानहरूमाथि पनि दाउ लगाइएको छ।
यसमा भारतका कप्तान विराट कोहली, रोहित शर्मा रहेका छन् भने पाकिस्तानबाट बाबर आजम र फखर जमांमाथि दाउ खेलिएकोछ।