जारी विश्वकप क्रिकेटमा शीर्ष चारमा अटाउन 'गर या मर'को अवस्थामा रहेको वेस्ट इण्डिजलाई झट्का लागेको छ।
अलराउण्डर आन्द्रे रसेल विश्वकपबाट बाहिरिने पक्का भएपछि उसलाई झट्का लागेको हो।
चोटका कारण रसेल न्यूजिल्याण्ड विरूद्धको खेल गुमाएका थिए। यो खेलमा वेस्ट इण्डिज मात्र ५ रनले पराजित हुन पुगेको थियो। रसेलले जारी विश्वकपमा हालसम्म ४ खेलेका छन्। यी खेलमा उनले ब्याटिङमा खास कमाल देखाउन सकेनन्। तर बलिङमा भने शानदार प्रदर्शन गर्दै पाँच विकेट लिए।
त्यस्तै ३ म्याचमा ब्याटिङ गरेका रसेलले यस विश्वकपमा केवल ३६ रन बनाएका छन्।
वेस्ट इण्डिजले रसेलको सट्टामा सुनील एम्बरिसलाई टोलीमा ल्याएको छ।
टोलीमा आएका २६ वर्षिय सुनीललाई ब्याटिङ् विशेषज्ञ मानिन्छ। उनले हालै आयरल्याण्डविरूद्धको खेलमा १४८ रनको पारी खेलेका थिए। हालसम्म ६ अन्तराष्ट्रिय खेल खेलेका उनले ३१६ रन बनाएका छन्।
जारी विश्वकपमा अहिलेसम्मको प्रदर्शन हेर्दा वेस्ट इण्डिजले कुल ६ म्याच खेलेकोमा ४ मा हार र एकमा जित हात पारेको छ। एक खेल भने वर्षाले अवरुद्ध बनेको थियो।
६ म्याचबाट उसले केवल ३ हंक जोडेको छ। अब बाँकी तीन खेलबाट उसले तीन वटैमा जित हासिल गरे पनि सेमिफाइनलको समिकरण पर्याप्त हुनेछैन।शीर्ष चारमा पर्न उसलाई अन्य टोलीको नतिजामा भर पर्नुपर्ने हुन्छ।
