एसिसी यु-१९ पूर्वी क्षेत्रीय प्रतियोगिताका लागि नेपाली युवा टिम घोषणा गरिएको छ।
आगामी आइतबार मलेसिया प्रस्थान गर्ने नेपाली युवा टिममा चार जना नयाँ अनुहार छन्। जसमा खडकबहादुर बोहोरा, तिलक भण्डारी, विशाल विक्रम केसी र लोकेश बम छन्।
खडकले गत महिना भएको प्रधानमन्त्री कपमा सुदूरपश्चिमबाट खेल्दै उत्कृष्ट प्रदर्शन गरेका थिए। विशाल यु–१६ टिमका कप्तान हुन्।
एसिसी यु-१९ आगामी असार १७ गतेदेखि २५ गतेसम्म हुँदैछ। प्रतियोगितामा नेपालसहित ८ टिमले भाग लिँदैछन्।
नेपाल समूह 'ए' मा परेको छ। नेपाल सम्मिलित समूहमा चीन, म्यानमार र सिंगापुर पनि छन्।
समूह 'बी' मा मलेसिया, भुटान, हङकङ र थाइल्यान्ड छन्।
नेपालले पहिलो खेल असा १७ गते म्यानमारसँग खेल्नेछ। नेपालको दोस्रो खेल असार २० मा सिंगापुर र अन्तिम असार २१ जुनमा चीनसँग छ।
समूहका शीर्ष २ टिम सेमिफाइनलमा पुग्नेछन्।
यसअघि नेपालले गत बैसाखमा मलेसियामै भएको आइसिसी यु-१९ विश्वकप छनोटमा प्रतिस्पर्धा गरेको थियो।
युएईविरुद्धको खेलमा १ रनले पराजित हुँदा नेपालको युवा विश्वकप खेल्ने लक्ष्य असफल भएको थियो। खेल वर्षले अवरुद्ध हुँदा युएईले डिएल मेथडमा १ रनले खेले जितेपछि नेपाल स्तब्ध बनेको थियो।
विश्वकप छनोटको तयारी भने नेपालले भारतको आन्द्र प्रदेशमा गरेको थियो। यस प्रतियोगिताका लागि नेपालले भारत भ्रमण गर्ने तयारी गरेको थियो। तर एसिसीको अनुमती पाउन नसक्दा भारत भ्रमणमा जान पाएन।
नेपाली टिम
रोहितकुमार पौडेल (कप्तान), पवन सर्राफ, कमलसिंह ऐरी, रित गौतम, हरिबाहादुर चौहान, विशालविक्रम केसी, प्रतिश जिसी, तिलकराज भण्डारी, रासिद खान, भीम सार्की, लोकेशबहादुर बम, सागर ढकाल, कुशल मल्ल, खडकबहादुर बोहरा
राजु खड्का- व्यवस्थापक
विनोदकुमार दास- प्रशिक्षक
विक्रम न्यौपाने- फिजियो
