पाकिस्तानले बुधबार जारी विश्वकपमा न्युजिल्याण्डको अपराजित यात्रालाई रोकिदिएको छ।
हिजोको खेलमा पाकिस्तानले न्युजिल्याण्डलाई ६ विकेटले पराजित गर्दै उसको अपराजित यात्रामा विराम लगाइ दिएको हो।
टस जितेर पहिले ब्याटिङ गरेको न्युजिल्याण्डले निर्धारित ५० ओभरको खेलमा ६ विकेटको नोक्सानीमा २३७ रन बनाएको थियो।
२३८ रनको जवाफी लक्ष्य पछ्याउन आएको पाकिस्तानले सो लक्ष्य ४९.१ ओभरमा चार विकेट गुमाउँदै हासिल गरेको थियो।
पाकिस्तानको जितमा बाबर आजमले अविजित १०१ रन बनाए। कुल १२७ बलको सामना गरेका आजमले ११ चौका प्रहार गरेका थिए।
यस्तै ह्यारिस सोहेलले ६८ रनको योगदान दिए। ७६ बलको सामना गरेका उनले यसक्रममा पाँच चौका र २ छक्का प्रहार गरेका थिए।
त्यसअघि बर्मिङघममा बुधबार टस जितेर पहिले ब्याटिङ गरेको न्युजिल्यान्डले ६ विकेटको क्षतिमा २३७ रन जोडेको थियो।
न्युजिल्यान्डका लागि छैटौं नम्बरका ब्याट्सम्यान जेम्स निशमले नटआउट ९७ रन जोडे। उनले ११२ बलमा ५ चौका र ३ छक्का हिर्काए।
कोलिन डे ग्रान्डहोमले ६४ रनको योगदान दिए। रनआउट हुनुअघि उनले ७१ बलमा ६ चौका र १ छक्का हिर्काए।
त्यसअघि ओपनर मार्टिङ गुपटिल ५ रनमै आउट भए। उनलाई मोहमद अमिरले बोल्ड गरेका थिए। कोलिन मुनरो १२ रनमा आउट हुँदा रोश टेलर ३ रन र टम लाथम १ रनमा आउट भएका थिए।
तीनै जनालाई साहिन शाह अफ्रिदीले आफ्नो सिकार बनाएका थिए।
न्युजिल्यान्डका कप्तान केन विलियमसन पनि ४१ रनमा आउट भएका थिए।
कुनै बेला ५ विकेट गुमाउदा ८३ रनमा रहेको न्युजिल्यान्डको इनिङ निशम र ग्रान्डहोमले उकासेका थिए।
बलिङमा पाकिस्तानका अफ्रिदीले ३ विकेट लिए। मोहमद अमिर र सादब खानले १–१ विकेट हात पारे।
पाकिस्तानको यस जितले जारी विश्वकपमा उसको सेमिफाइनल यात्राको आशालाई जिवितै राखेको छ। अब पाकिस्तानले दुई खेल खेल्न बाँकी छ। बाँकी दुई खेल जितेमा पनि उसको समिफाइनल यात्रा अन्य टोलीको नतिजामा पनि उत्तिकै भर पर्छ।
पाकिस्तानले अब २ खेल जित्दा उसको ११ अंक हुन्छ। ११ अंक जोडेपछि पाकिस्तानको सेमिफाइनल यात्राका लागि इङ्ल्याण्डले आफ्नो बाँकी दुई खेलमा कम्तिमा एकमा हार वा भारतले कम्तिमा ३ मा हार बेहोर्नुपर्छ।
कुल सात खेल खेलिसकेको न्यूजिल्याण्ड ५ जित, १ हार तथा १ बराबरीसहित ११ अंक जोडेर अंकतालिकाको दोश्रो स्थानमा छ भने पाकिस्तान ३ जित, ३ हार र १ बराबरी सहित ७ अंक जोडेर लिगको छैटौं स्थानमा रहेको छ।
