आइसिसी क्रिकेट विश्वकप २०१९ मा भारत अपराजित यात्रा कायम राख्दै सेमिफाइनल सम्भावना बलियो बनाउन चाहन्छ।
५ खेलबाट ९ अंक जोडेर अंक तालिकाको तेस्रो स्थानमा रहेको भारतले बिहीबार म्यानचेस्टरमा वेस्ट इन्डिजसँग खेल्दैछ।
अघिल्लो खेलमा वेस्ट इन्डिजले स्तब्धपूर्ण हार बेहोरेको थियो। न्युजिल्यान्डविरुद्धको खेलमा ५ रनले पराजित हुँदा वेस्ट इन्डिजको सेमिफाइनल यात्रा कठीन बनेको थियो।
जितका लागि ६ रन चाहिएको स्थितिमा शतक प्रहार गरेका कार्लोस बाथवेट बाउन्ड्रीमा क्याच हुँद वेस्ट इन्डिज स्तब्ध बनेको थियो। घाइते अवस्थामा रहेको वेस्ट इन्डिजलाई लगत्तै अर्को झड्का लाग्यो। भरपर्दा अलराउन्डर आन्द्रे रसेल चोटग्रस्त हुँदै टिमबाट बाहिरिए।
६ खेलबाट ३ अंक जोडेर अंक तालिकाको आठौं स्थानमा रहेको वेस्ट इन्डिजको सेमिफाइनल पुग्ने सम्भावना गणितीय छ। त्यसैले वेस्ट इन्डिजले भारतविरुद्ध सम्पूर्ण शक्ति खर्च गर्ने छ।
भारतका बलरले टिमलाई जिताउन सक्ने प्रमाणित गरिरहेका छन्। अफगानिस्तानविरुद्ध भारतलाई बलरले जिताए। मोहमद सामीले अन्तिम ओभरमा ह्याट्रिक गरेपछि भारतले सम्भावित हार टारेको थियो।
भारतको समस्या मिडल अर्डर ब्याटिङमा देखिएको छ। त्यसैले मिडल अर्डरमा सुधार गर्दै भारत अर्को जितको खोजीमा हुनेछ।
म्यानचेस्टरमा बिहीबार दिनभर घाम लाग्ने पूर्वानुमान छ। सुख्खा हुने हुँदा स्पिनरलाई सघाउ पुग्ने अनुमान छ। मैदानमा खेलिएका पछिल्ला तीन खेलमा पहिले ब्याटिङ गर्ने टिम विजयी भएको छ।
