इङ्ल्याण्डमा जारी विश्वकपमा शुक्रबार भएको खेलमा दक्षिण अफ्रिकाले श्रीलंकालाई ९ विकेटले पराजित गरेको छ।
विश्वकपको सेमिफाइनल दौडबाट बाहिरिसकेको दक्षिण अफ्रिकाको जारी प्रतियोगितामा यो दोश्रो जित हो।
हिजो भएको खेलमा पहिले ब्याटिङ गर्दै श्रीलंकाले ४९.३ ओभरमा अलआउट हुँदै दक्षिण अफ्रिकालाई २०४ रनको लक्ष्य दिएको थियो।
जवाफी ब्याटिङमा आएको दक्षिण अफ्रिकाले सो लक्ष्य ३७.२ ओभरमा मात्र एक विकेको नोक्सानीमा प्राप्त गरेको थियो।
दक्षिण अफ्रिकाको जितमा कप्तान फाफ डु प्लेसिस र हाशिम अमलाले क्रमशः अविजित ९६ र ८० रन बनाएका थिए। दक्षिण अफ्रिकाको जितमा यी दुईको साझेदारी नै पर्याप्त रह्यो।
यस्तै अफ्रिकाको लागि क्वींटन डि ककले १५ रनको योगदान दिए। श्रीलंकाका लागि एकमात्र विकेट लसिथ मांलिगाले लिए।
त्यसअघि टस जितेको दक्षिण अफ्रिकाले पहिले फिल्डिङ गर्ने निर्णय गरेपछि पहिले ब्याटिङ गरेको श्रीलंका ३ बल खेल्न बाँकी छदा २०३ रनमा अलआउट भएको थियो।
श्रीलंकाका लागि कुशल परेरा र अभिस्का फर्नान्डोले समान ३०-३० रन बटुले। अन्य ब्याट्सम्यानले उल्लेख्य रन जोड्न सकेनन्।
बलिङमा दक्षिण अफ्रिकाका ड्वायन प्रेटोरियस र क्रिस मोरिसले ३-३ विकेट लिए। कागिसो राबाडाको नाममा २ विकेट रह्यो।
हारसँगै श्रीलंकाको सौमिफाइनल यात्रा कटिन बनेको छ। बाँकी दुई खेल जितेपनि उसलाई सेमिफाइनल प्रवेशका लागि कठिन अंक गणितिय समिकरणको साथ हुनु जरूरी छ।
