विश्वकप क्रिकेट खेलमा पाकिस्तानले अफगानिस्तानमाथि ३ विकेटको जित दर्ता गरेको छ।
शनिबार भएको खेलमा पहिले ब्याटिङ गरेको अफगानिस्तानले निर्धारित ओभरमा ९ विकेटको नोक्सानीमा २२७ रनको योगफल तयार गरेको थियो।
त्यसपछि २२८ रनको लक्ष्य भेट्टाउन आएको पाकिस्तानले अन्तिम दुई बल बाँकी छँदा ७ विकेटको नोक्सानीमा अफगानिस्तानमाथि जित दर्ता गर्यो।
पाकिस्तानको सुरूवात भने राम्रो रहेन। ओपनर फखर जमान पहिलो ओभरमा नै मुजिब उर रहमानबाट शून्यमा एल्बिडब्लु भए।
दोश्रो विकेटका लागि भने इमाम उल हब र बाबर आजमले ७२ रनको साझेदारी गरे। १६ औं ओभरमा इमाम ३६ रनको ब्यक्तिगत स्कोरमा आउट भए भने बाबरले ४५ रन जोडे।
यसैगरी पाकिस्तानको पारीमा इमाद वासिमले अविजित ४९ रन खेले भने हरिस सोहेलले २७ रन बनाए।
यस पारीमा अफगानिस्तानका लागि मोहम्मद नाबी र मुजिब उर रहमानले समान २-२ विकेट लिदां राशिद खानले १ विकेट लिएका थिए।
त्यसअघि पाकिस्तानलाई २२८ रनको लक्ष्य दिने क्रममा अफगानिस्तानका लागि नजिबुल्लाह जद्रान र अस्घर अफगानले समान ४२ रन बनाए। यसैगरी रहमत शाहले ३५ रनको योगदान दिदां इक्रम अलि खिलले टोलीका लागि २४ रन जोडेका थिए।
पाकिस्तानका लागि शाहिन अप्रिदीले सर्वाधिक ४ विकेट लिदां इमाद वासिम र वहाब रियाजले समान २-२ विकेट लिए भने शदाब खानले १ विकेट झारे।
जितसँगै पाकिस्तानले अंक तालिकामा ९ अंक जोडेको छ। उसको यो जितले जारी विश्वकपमा सेमिफाइनल समिकरणलाई रोचक मोडमा पुर्याएको छ। जितसँगै अंकतालिकाको चौथो स्थानमा उक्लेको पाकिस्तानले अब अन्तिम खेल बंगलादेशसँग खेल्नेछ। यस खेलमा विजयी भएमा र आयोजक इङ्ल्याण्डले आफ्ना बाँकी दुई खेलमध्ये मात्र एकमा हार बेहोरेमा पाकिस्तान सेमिफाइनलमा पुग्नेछ।
यस प्रतियोगिताको सेमिफानलमा अस्ट्रेलिया पुगिसकेको छ भने भारत र न्युजिल्याण्डलाई १ जित आवश्यक रहेको छ।
