शनिबार अस्ट्रेलिया र न्यूजिल्याण्डबीच भएको विश्वकप क्रिकेट खेलमा अस्ट्रेलिया ८६ रनले विजयी भएको छ।
पहिले ब्याटिङ गर्दै अस्ट्रेलियाले ९ विकेटको क्षतिमा न्यूजिल्याण्डलाई २४४ रनको लक्ष्य दिएको थियो।
लक्ष्य भेट्टाउन आएको न्यूजिल्याण्डको टोली ४३.३ ओभरमा १५७ रनमै समेटिएपछि अस्ट्रेलियाले न्युजिल्याण्डमाथि ८६ रनको जित दर्ता गरेको हो।
जारी विश्वकपमा अस्ट्रेलियाको यो सातौं जित हो। सात जितबाट १४ अंक जोडेको अस्ट्रेलिया अंक तालिकाको शीर्ष स्थानमा कायमै रहेको छ।
अस्ट्रेलियाको जितमा एलेक्स क्यारी र मिचेल स्टार्क नायक बने। क्यारी अस्ट्रेलियालाई कठीन परिस्थितिबाट उभो लगाउँदै ७२ बलमा ७१ रन जोडे भने स्टार्कले ५ विकेट झारेर न्यूजिल्याण्डलाई १५७ रनमा सिमित गर्न महत्वपूर्ण भूमिका खेले।
हिजोको खेलमा अस्ट्रेलियाका लागि उस्मान ख्वाजाले ८८ रनको योगदान दिए।
जवाफी ब्याटिङमा आएको न्युजिल्याण्ड अस्ट्रेलियाका बलरहरूको घातक बलिङ अगाडी धेरै बेर टिक्न सकेनन्। न्युजिल्याण्डका लागि कप्तान केन विलियमसनले ४० रन र रस टेलरले ३० रन बनाउने बाहेक उसका अन्य कुनै पनि ब्याटसम्यानले गतिलो प्रदर्शन गर्न सकेनन्।
यस पारीमा अस्ट्रेलियाका लागि मिचेल स्टार्कले पाँच विकेट लिदां जेसन बेहरनडर्फले २ विकेट लिए। यस्तै प्याट कमिन्स,नाथन लायन र स्टिभ स्मिथले १-१ विकेट झारे।
खेलमा न्युजिल्याण्डका ट्रेन्ट बोल्टले शानदार प्रदर्शन गर्दै ह्याट्रिक गरे पनि न्युजिल्याण्डलाई जित दिलाउन सकेन।
उनले ह्याट्रिक गर्ने क्रममा अन्तिम ओभरको तेश्रो बलमा उस्मान ख्वाजालाई बोल्ड गरे। त्यसपछि उनले चौथो बलमा मिचेल स्टार्कलाई र पाँचौ बलमा जेसन बेहरनडर्फलाई आउट गरे। स्टार्कलाई पनि बोल्ड नै गरेका उनले बेहरनडर्फलाई एलबिडब्लु गरे। १० ओभर बलिङ गर्दै १ मेडन सहित ५१ रन खर्चिएका बोल्टले खेलमा कुल चार विकेट लिए।
जारी विश्वकप प्रतियोगितामा बोल्ट ह्याट्रिक गर्ने दोश्रो खेलाडी हुन भने विश्वकपमा न्युजिल्याण्डका लागि ह्याट्रिक गर्ने पहिलो खेलाडी हुन्। यस विश्वकपमा भने उनी अगाडि भारतका मोहम्मद शमीले अफगानिस्तान विरूद्ध ह्याट्रिक गरेका थिए।
