आइसिसी क्रिकेट विश्वकप २०१९ अन्तर्गत मंगलबार बर्मिङघमको एजबेस्टन मैदानमा भएको खेलमा बंगलादेशलाई २८ रनले पराजित गर्दै भारत सेमिफाइनलमा प्रवेश गरेको छ।
खेलका दौरान भारतीय टिमलाई समर्थन गर्न पुगेकी बृद्ध महिला अहिले सोसल मिडियामा भाइरल भइरहेकी छिन्।
भारतीय टिमको हौसला बढाउन पुगेकी ८७ वर्षीय चारुलता पटेल खेल अवधिभर उत्साहित थिइन्। खेलकै क्रममा आइसिसीले उनको तस्बिर तथा भिडियो सामाजिक सञ्जालमा पोस्ट गरेको थियो।
खेल सकिएपछि उनलाई भेट्न भारतीय कप्तान विराट कोहली र ओपनिङ ब्याट्सम्यान रोहित शर्मा पुगेका थिए।
भेटपछि विराट कोहलीले ट्विटरमा पोस्ट गर्दै लेखेका छन्, ‘हाम्रा सबै समर्थकको माया र समर्थनका लागि तथा विशेषगरी चारुलता पटेल जीको धन्यवाद दिन चाहान्छु। उहाँ ८७ वर्षको हुनुहुन्छ। सायद उहाँ सबैभन्दा भावुक र समर्पित समर्थक मध्येको एक हुनुहुन्छ।’
यता आइसिसीले पोस्ट गरेको भिडियोमा विराट र रोहितले बृद्ध समर्थकबाट आर्शिवाद लिएको देखिएको छ।
