आइसिसी क्रिकेट विश्वकप २०१९ मा सेमिफाइनल पुग्ने टिमको चारै टुंगो लागेको छ।
शुक्रबार पाकिस्तानले बंगलादेशविरुद्धको खेलमा आवश्यक रनरेट बटुल्न नसक्ने पक्का भएसँगै न्युजिल्यान्ड अन्तिम चारमा पुग्ने चौथो टिम बन्यो। यसअघि अस्ट्रेलिया, भारत र इंग्ल्यान्डले अन्तिम चारमा स्थान पक्का गरेका थिए।
पाकिस्तानले जारी खेलमा बंगलादेशलाई हराए उसको ११ अंक हुनेछ। तर ११ नै अंक भएको न्युजिल्यान्डलाई रनरेटमा पछि पार्न भने सक्ने छैन।
यससँगै न्युजिल्यान्ड अंक तालिकामा चौथो बन्ने पक्का भएको छ। अब न्युजिल्यान्डले सेमिफाइनलमा अंक तालिकाको शीर्ष टिमसँग प्रतिस्पर्धा गर्नेछ।
१२ अंक जोडेको इंग्ल्यान्ड अंक तलिकामा तेस्रो भएको छ।
अंक तालिकाको तेस्रो भएको इंग्ल्यान्डले अंक तालिकामा दोस्रो हुने टिमसँग अर्को सेमिफाइनलमा खेल्नेछ।
अंक तालिकामा अस्ट्रेलिया १४ अंक जोडेर शीर्ष स्थानमा छ। दोस्रो स्थानको भारतको १३ अंक छ।
शनिबार भारत र श्रीलंका तथा दक्षिण अफ्रिका र अस्ट्रेलियाबीच खेल हुनेछ। त्यसपछि अंक तालिकामा पहिलो र दोस्रो हुने टिमको टुंगो लाग्नेछ। शनिबार हुने दुई खेलसँगै समूह चरणका सबै खेल सकिनेछ।
पहिलो सेमिफाइनल मंगलबार र दोस्रो सेमिफाइनल बिहीबार हुनेछ। फाइनल आगामी जुलाई १४ आइतबार लन्डनस्थित लार्ड्समा हुनेछ।
