इङ्ल्याण्डमा जारी विश्वकप क्रिकेटको अन्तिम खेलमा भारतले श्रीलंकालाई ७ विकेटले पराजित गरेको छ।
शनिबार सम्पन्न खेलमा श्रीलंकाले पहिले ब्याटिङ गर्दै भारतलाई निर्धारित ओभरमा ७ विकेटको नोक्सानीमा २६५ रनको लक्ष्य दिएको थियो।
सो लक्ष्य भारतले ३ विकेटको क्षतिमा ४३.३ ओभरमा पूरा गरेको थियो।
भारतको यस जितमा ओपनर रोहित शर्मा तथा केएल राहुलले शतकीय पारी खेले। पहिलो विकेटका लागि उनीहरूले १८९ रनको साझेदारी गरेका थिए। यसक्रममा रोहितले १०३ रन प्रहार गरे भने राहुलले १११ रन बनाए यस्तै कप्तान विराट कोहलीले नटआउट ३४ रन खेले।
श्रीलंका लागि लसिथ मालिंगा, कसुन रजिथा तथा इसरू उडानाले एक-एक विकेट लिए।
यसैगरी पहिले ब्याटिङ गरेको श्रीलंकाका लागि एन्जेले म्याथुजले ११३ रनको शतकिय पारी खेले। त्यस्तै लाहिरू थिरमानेले ५३ रन बनाए।
श्रीलंकाको यस इनिङमा भारतका लागि जसप्रीत बुमराहले सर्वाधिक ३ विकेट लिए भने भुवनेश्वर कुमार, हार्दिक पान्ड्या, रविन्द्र जडेजा तथा कुलदीप यादबले १-१ विकेट लिए।
जीतसँगै भारतले लिग चरणको खेल १५ अंक सहित पहिलो स्थानमा सकेको छ। उसले कुल नौ खेलमा ७ मा जित, एकमा हार तथा एकमा बराबरीसहित १५ अंक जोडेको हो।
त्यस्तै १४ अंक जोडेको अस्ट्रेलिया दोश्रो स्थानमा रहँदा आयोजक इङ्ल्याण्ड १२ अंकसहित तेश्रो स्थानमा रहेको छ भने न्युजिल्याण्ड चौथो स्थानमा रहेको छ।
