विश्वकप क्रिकेट फाइनलमा भएको ओभरथ्रोमा दिइएको निर्णयमा त्रुटि भएको सो खेलका अम्पायर कुमार धर्मसेनाले स्वीकार गरेका छन्। यस फाइनल खेलमा ओभरथ्रोमा दिइएको चार रनले ठूलै विवाद निम्त्याएको थियो।
फाइनल खेलमा २४२ रनको लक्ष्य पिछा गर्न आएको इङ्ल्याण्डका दुई ब्याट्सम्यानले दौडेर रन लिइरहेको अवस्थामा गुप्टिलले थ्रो गरेको बल बेन स्टोक्सको ब्याटमा ठोकिदैं बाउण्ड्रीमा परिणत भएको थियो। त्यसपछि धर्मसेनाले इङ्ल्याण्डले दौडेर बनाएको २ र बाउण्ड्रीको ४ गरेर इङ्ल्याण्डलाई ६ रन दिएका थिए।
सो रनको सहयोगमा इङ्ल्याण्ड खेलमा फर्कियो र खेल निर्धारित ५० ओभरमा बराबरीमा सकियो। त्यसपछि सुपर ओभर भयो जसमा पनि दुबै टोलीले रोमाञ्चक बराबरी गरे। अन्ततः बाउण्ड्री नियमका आधारमा आयोजक इङ्ल्याण्ड विश्वविजेता घोषित भयो।
'टिभीमा रिप्ले हेरेपछि म गल्ती भएको स्वीकार गर्छु, निर्णय गर्दा गल्ती भएको थियो। तर मैदानमा रिप्ले हेर्ने सहुलियत थिएन र मलाई मैले दिएको निर्णयप्रति पछुतो पनि छैन', श्रीलंकाली अखबार सन्डे टाइम्ससँगको अन्तरवार्तामा धर्मसेनाले भनेका छन्।
सो समयमा ६ रन दिने निर्णय गलत भएको भन्दै पूर्व अम्पायर साइमन ट्राफेलले ५ रनमात्र दिनुपर्ने बताएका थिए। उनले ब्याटसम्यानहरूले दोश्रो रन पूरा गरिनसकेकाले ५ रन मात्र दिनुपर्ने मत राखेका थिए।
'मैले लेग अम्पायरसँग सल्लाह लिएँ, जसलाई अन्य अम्पायर र म्याच रेफ्रीले सुने। उनीहरूले टिभीमा रिप्ले हेर्न पाउँदैनथे, उनीहरूले पनि ब्याटसम्यानले दोश्रो रन पूरा गरेको पुष्टि गरेपछि मैले आफ्नो फैसला गरेको हुँ', धर्मसेनाले सो अन्तरवार्तामा भनेका छन्।