आइसिसी टी–२० विश्वकप एसिया छनोट प्रतियोगितामा मलेसियाले कुवेतलाई ४२ रनले पराजित गरेको छ।
सोमबार सिंगापुरमा भएको खेलमा मलेसियाले दिएको १६३ रनको लक्ष्य पछ्याएको कुवेत १८ ओभरमा १२० रनमै अलआउट भयो।
उसका लागि कप्तान मोहमद कासिफले ५१ रन जोडे। उनले ४६ बलमा ३ चौका र २ छक्का प्रहार गरे। अन्य ब्याट्सम्यान सस्तैमा आउट हुँद कासिफको आर्धशतक काम लागेन।
बलिङमा मलेसियाका मुहमद सहादतले ३ विकेट लिए। सयद अजिज, पवनदिप सिंह र फित्री सामले २–२ विकेट हात पारे।
टस जितेर पहिले ब्याटिङ गरेको मलेसिया २० ओभरमा १६२ रनमा अलआउट भयो।
मलेसियाका लागि मध्यक्रमका ब्याट्सम्यान शाफिक सारिफले ३८ रन जोडे। उनले २७ बलमा ६ चौका हिर्काए।
सयद अजिजले ३४ रन र अमिनुद्दिन रामलीले ३३ रनको योगदान दिए। अजिजले २८ बलमा ४ चौका र १ छक्का तथा रामलीले १२ बलमा १ चौका र ४ छक्का प्रहार गरे।
बलिङमा कुवेतका मोहमद असनले २ विकेट लिए।
प्रतियोगितामा सिंगापुर, कतार, नेपाल, मलेसिया र कुवेतको सहभागिता छ। नेपालले आफ्नो पहिलो खेल मंगलबार विहान कतारसँग खेल्नेछ।
राउन्ड रोबिनको आधारमा हुने प्रतियोगिताको च्याम्पियन टिम विश्व छनोट प्रतियोगितामा पुग्नेछ।