गत साता भारतका पूर्व कप्तान महेन्द्र सिंहको सम्भावित संन्यासलाई लिएर खुबै चर्चा चल्यो। अन्ततः ती केवल चर्चामा सिमित रहे, धोनीले संन्यासको घोषणा गरेनन्।
आइतबार भारतीय क्रिकेट कन्ट्रोल बोर्डसँगको भेटपछि धोनीले तत्काल संन्यास लिने सोचमा नरहेको सार्वजनिक भयो।
धोनीले अबको दुई महिना आफ्नो प्यारासुट रेजिमेन्टसँग तालिम लिनेछन्। तालिमका लागि उनले क्रिकेटबाट २ महिना छुट्टी लिएका छन्। उनी वेस्ट इण्डिज सिरिजका लागि उपलब्ध हुनेछैनन्।
उनको सट्टा भारतीय टोलीको विकेटकिपिङको जिम्मेवारी ऋषभ पंत तथा ऋद्धिमान साहालाई दिइएको छ। पंतलाई तीनै शैलीका क्रिकेटको विकेटकिपिङका लागि निर्धारण गरिएको भएपनि टेस्ट क्रिकेटमा भने पंतको सट्टा साहाले विकेटकिपिङ् गर्नेछन्।
पंतलाई विश्वकप टि-२० क्रिकेट विश्वकपलाई ध्यानमा राख्दै टोलीमा छनौट गरिएको बताइन्छ।
यसैगरी नयाँ चर्चा अनुसार भारतीय क्रिकेट प्रबंधन धोनीलाई टोलीमा यथावत राख्न चाहन्छ। उनीहरू धोनीले संन्यास नलिउन भन्ने चाहेको छ।
प्रबन्धनले पंत घाइते भएको अवस्था र धोनीले संन्यास लिएको अवस्थामा टोलीमा एककिसिमको खालीपना आउने भएकाले धोनीले तत्काल संन्यास नलिए हुने सोचेको हो।
यस किसिमको खालीपना तत्कालका लागि पूरा गर्न उनीहरूलाई गार्हो हुने भएकाले यस्तो गरिएको बताइन्छ।
'धोनी आफ्नो भूमिका र स्थितिका बारेमा जानकार छन्। सबै उनको संन्यासको बारेमा कुरा गरिरहेका छन् तर जब उनले छोड्ने निर्णय गर्नेछन् तब उनी टोलीका खेलाडी हुनकी होइनन, त्यो बुझ्न सकिने छैन। उनी कहिले कुनै विवादमा आफ्नो प्रतिक्रिया दिदैंनन्। मलाई विश्वास छ, सबजना उनको नैतिकताको बारेमा धेरै जान्नेहुनुहुन्छ', एक सुत्रले भन्यो।
'यस्तो टिम व्यवस्थापनले टि-२० विश्वकप क्रिकेटलाई ध्यानमा राख्दै पंतलाई राम्रो बनाउन चाहन्छन् र धोनी एक प्रशिक्षक जस्तो रहुन्। जब टोलीलाई आवश्यक पर्छ, उनी टोलीमै रहून', भारतीय समाचार संस्था आएएनएससँग कुरा गर्दै सो सुत्रले भन्यो, 'तपाईं आफै हेर्नुस् यदि पंत घाइते भए भने उनको विकल्प को हुन्छ? सत्य भन्नुपर्दा कुनै पनि नाम धोनीको बराबरीमा छैन। हो, पंतको भविष्य भएको कुरालाई अस्वीकार गर्न सकिन्न, त्यसैले उनलाई सबै शैलीमा परिक्षण गरियोस्। तर, धोनीको मार्गदर्शन र उपस्थिति एकदमै जरूरी छ।'
टोलीका मूख्य चयनकर्ता एमएसके प्रसादले पनि पंतलाई सबै प्रकारका क्रिकेटका लागि हेरिएको बताइसकेका छन्। यस्तै कहिले संन्यास लिने भन्ने बारेमा धोनीले फैसला गर्नुपर्ने उनको भनाइ छ।
'संन्यासको फैसला पूर्णरूपमा व्यक्तिगत हो। धोनी जस्ता दिग्गज क्रिकेटर कहिले संन्यास लिने भनेर राम्ररी जान्दछन्। तर जहाँसम्म भविष्यको कुरा छ, त्यो त चयनकर्ताको हातमा छ। उनी यो सिरिजका लागि उपलब्ध हुनेछैनन्', प्रसादले चयन समितिको बैठकपछि भनेका थिए।
'हामीले विश्वकपसम्मका लागि एउटा मार्गचित्र बनाएका छौं र हाम्रा अगाडीका योजनाहरू पनि तयार छन्। तर अहिलेलाई हामी पंतजस्ता खेलाडीको कौशललाई निखार्न चाहन्छौं। पंतलाई त्यस्तो टोलीमा सामेल गर्नै नहुनेगरी उनले कुनै गल्ती गरेका छैनन्।'