श्रीलंकाका पेस बलर लसिथ मालिंगाले एक दिवसीय क्रिकेटबाट संन्यासको लिने भएका छन्।
उनले बंगलादेशविरूद्धको ३ एक दिवसीय क्रिकेट श्रृंखलाको पहिलो खेल पछि संन्यास लिन लागेका हुन्। श्रीलंकाका स्कीपर दिमुथ करूणारत्नेले सोमबार यसको जानकारी दिएका हुन्।
करूणारत्नेले यस श्रृखंलाको पहिलो खेलमा मात्र ३५ वर्ष फास्ट बलर तथा पूर्व कप्तान मालिंगाले खेल्ने बताए।
श्रृखंला जुलाई २६ बाट कोलम्बोमा सुरू हुँदैछ।
'उनले पहिलो खेल खेल्नेछन्। त्यसपछि उनले संन्यास लिदैंछन्। उनले मलाई यही बताएका छन्। उनले चयनकर्ताहरूलाई के भने त्यो मलाई थाहा छैन तर मसँग भने उनले एउटा मात्र खेल खेल्ने बताएका छन्', करूणारत्नेले भने।
एक दिवसीय क्रिकेटमा श्रीलंकाको तेश्रो सर्वाधिक विकेट लिने खेलाडीका रूपमा उनले संन्यास लिनेछन्।
देशका लागि कुल २१९ एक दिवसीय खेल खेल्दै मालिंगाले ती खेलहरूबाट ३३५ विकेट लिएका छन्।
यस सूचिको पहिलो नम्बरमा ५२३ विकेट सहित मुथैया मुरलीधरन पहिलो नम्बरमा रहेका छन् भने ३९९ विकेटसहित चामिण्डा भास दोश्रो स्थानमा रहेका छन्।
त्यस्तै मालिंगा विश्वकप क्रिकेटमा श्रीलंकाका लागि सर्वाधिक विकेट लिने खेलाडी हुन्।
विश्वकपका ७ इनिङ खेलेका उनले १३ विकेट लिएका छन्। उनले टेस्ट क्रिकेटबाट भने सन् २०११ मा नै संन्यास लिइसकेका थिए।
