श्रीलंकाली पेस बलर लसिथ मालिंगाले अन्तराष्ट्रिय क्रिकेटबाट संन्यास लिने घोषणा गरिसकेका छन्।
बंगलादेशविरूद्धको ३ खेलको एक दिवसीय खेलको पहिलो खेल उनको करियरको अन्तिम अन्तराष्ट्रिय खेल हुनेछ।
उनको संन्याससँगै क्रिकेटको बलिङ इतिहासमा एउटा युगको अन्त्य हुनेछ। उनी यार्करम्यानको विशेषणले चर्चित छन्। उनले फाल्ने सटिक यार्करका कारण डेथ ओभर्समा ब्याटस्म्यानहरू खुलेर खेल्न सक्दैनन्। त्यसैले उनलाई यार्करम्यानको विशेषण दिइएको हो। आफ्नो विविधतायुक्त यार्करबाट उनले ब्याटस्म्यानहरूलाई खुलेर खेल्न कठिन पार्थे।
क्रिकेट करियरमा उनको अजिब बलिङ एक्सनमाथि प्रश्नहरू पनि उठे। तर जाँचमा सो एक्सन स्वभाविक सावित भयो। मालिंगाले बलिङमा राम्रो इतिहास बनाएका छन्। यसक्रममा उनले केहि कीर्तिमानहरू पनि बनाएका छन्, जसमध्ये एउटा भने उनका लागि सँधै विशेष रहिरहनेछ।
अन्तराष्ट्रिय क्रिकेटमा लगातार चार बलमा चार विकेट लिने उनी एकमात्र बलर हुन्।
यो उनको विशेष उपलब्धि हो।
उनले यो उपलब्धि सन् २००७ को विश्वकप क्रिकेटमा दक्षिण अफ्रिकाविरूद्धको हासिल गरेका थिए। सो विश्वकपको सुपर ८ खेलमा उनले लगातार ४ विकेट लिएका थिए।
लगातार ४ विकेट लिए पनि खेल भने दक्षिण अफ्रिकाले नै जितेको थियो। त्यतिबेला मालिंगाले शान पोलक, एन्ड्रयू हल, ज्याक कालिस र मखाया नतिनीलाई एकपछि अर्को गर्दै लगातार पेभेलियन फर्काइदिएका थिए।
यसरी लिएका थिए ४ विकेट
सो खेलमा श्रीलंकाले पहिलो ब्याटिङ गर्दै २०९ रन बनाएको थियो। यस पारीमा दक्षिण अफ्रिकाका कार्ल लैंग्वेल्टले ५ विकेट लिएका थिए। त्यसपछि जवाफी ब्याटिङमा आएको दक्षिण अफ्रिकाका लागि ज्याक कालिसको शानदार ब्याटिङ गरेर टोलीलाई जितको नजिक पुर्याए।
४४.४ ओभरमा ५ विकेटको क्षतिमा टोलीले २०६ रन बनाइसकेको अवस्था थियो। टोलीलाई जितका लागि केवल ५ रन चाहिएको थियो।
त्यहीबेला मालिंगाले ऐतिहासिक बलिङ गरे।
मालिंगाले पहिलो विकेटका रूपमा शान पोलकलाई स्लोअर बलमा बोल्ड गरे। त्यसपछि एन्ड्रयू हललाई शानदार यार्कर हाने र थरंगाको हातबाट क्याच आउट गराए।
खेल ४७ औं ओभरमा प्रवेश गर्यो।
उनले पहिलो बलमा ज्याक कालिसलाई कुमार संगकाराको हातबाट क्याच गराएर ह्याट्रिक पूरा गरे।
मालिंगा त्यही रोकिएनन्। लगत्तैको बलमा यार्कर हानेर मखाया नतिनीलाई बोल्ड गराए र इतिहास रचिदिए।
उनको यो कीर्तिमान हर कोही बलरको सपना भित्र पर्दछ।
मालिंगाले आफ्नो करियरमा वान डेमा २९.०२ को औषतमा ३३५ विकेट लिएका छन् भने ३० टेस्ट खेलेका उनले ३३.१५ को औषतले १०१ विकेट लिएका छन्।
उनी श्रीलंकाका लागि सर्वाधिक विकेट लिने तेश्रा बलरसमेत हुन्। उनले विश्वकपमा २ पटक ह्याट्रिक गरेका छन्।
