आइसिसी टी-२० विश्वकप अन्तर्गत एसिया छनोट प्रतियोगितामा मलेसियाले नेपाललाई ८४ रनको लक्ष्य दिएको छ।
वर्षाका ९ ओभरमा झारिएको खेलमा टस जितेको नेपालले फिल्डिङ रोजेपछि पहिले ब्याटिङ गरेको मलेसियाले ७ विकेटको क्षतिमा ८३ रन जोड्यो।
मलेसियाका लागि सएद अजिजले सबैभन्दा बढी ३० रन जोडे। उनले १५ बलमा ५ चौका र १ छक्का प्रहार गरे। विरनदिप सिंहले १६ बलमा २१ रन जोडे।
बलिङमा नेपालका सोमपाल कामीले ३ विकेट लिए। मलेसियाका दुवै ओपनरलाई आउट गरेका सोमपालले २ ओभरमा २३ रन दिए। १ ओभर बलिङ गरेका बसन्त रेग्मीले २ विकेट लिए। करण केसी र सन्दीप लामिछानेले १-१ विकेट हात पारे।
पहिलो खेलमा बेहोरेको हार र कप्तान पारस खड्का घाइते हुँदा दबाबमा रहेको नेपालका लागि बुधबारको खेल जित्नुको विकल्प छैन।
मलेसियाविरुद्धको खेलपछि नेपालले २ दिन आराम गरेर अन्तिम २ खेल खेल्नेछ। जुन खेलका लागि कप्तान पारस पूर्ण फिट हुन सक्छन्। त्यसैले नेपालका लागि बुधबार मलेसियाविरुद्धको खेल महत्वपूर्ण छ।
नेपालले शनिबार कुवेतसँग प्रतिस्पर्धा गर्नेछ। नेपालले आइतबार अन्तिम खेलमा आयोजक सिंगापुरको सामना गर्नेछ। यी तीनै खेल जिते नेपाल विश्व छनोटमा पुग्नेछ।