विश्वकप क्रिकेटको उपाधि जित्नबाट विमूख न्युजिल्याण्डले मन भने सबैको जित्यो।
फाइनल खेलमा 'प्लेयर अफ द म्याच' ईङ्ल्याण्डका बेन स्टोक्सले जिते। त्यस्तै न्युजिल्याण्डका कप्तान केन विलियम्सनले 'प्लेयर अफ दि टुर्नामेन्ट' घोषित भए।
अब यी दुबै खेलाडी अर्को एक अवार्डका लागि आमुन्नेसामुन्ने भएका छन् र अवार्ड हो-न्युजिल्याण्डर अफ द इयर अवार्ड।
अवार्डका लागि मनोनित भएपनि अलराउण्डर बेन स्टोक्सले केन अवार्डको असली हकदार रहेको र उनैलाई दिइनुपर्ने बताएका छन्।
इन्स्टाग्राममा एक स्टाटस लेख्दै स्टोक्सले यस्तो विचार राखेका हुन्।
'न्युजिल्याण्डर अफ द इयर'का लागि मनोनित भएकोमा धेरै खुशी छु। मलाई मेरो न्युजिल्याण्ड र माओरी परम्परामाथि गर्व छ तर यो प्रतिष्ठित पुरस्कारका लागि मलाई नामाकिंत गर्नु सहि होइन। यस्ता मान्छे छन् यो अवार्डको हकदार छन् जसले न्युजिल्याण्ड देशका लागि धेरै गरेका छन्', इन्स्टाग्राममा बेन स्टोक्सले लेखेका छन्।
स्टोक्स न्युजिल्याण्डका पूर्व रग्वी खेलाडी तथा प्रशिक्षक गेरार्ड स्टोक्सका छोरा हुन्। बेन १२ वर्षको हुँदादेखि इङ्ल्याण्ड बस्न थालेका थिए।
'मलाई लाग्छ पूरा देशले न्युजिल्याण्डका कप्तान केन विलियम्सनलाई समर्थन गर्नुपर्छ। उनी महान छन्। उनले यस विश्वकपमा आफ्नो टोलीको नेतृत्व कुशल र सम्मानका साथ गरे। उनी प्लेयर अप द टुर्नामेन्ट र आफ्ना मान्छेका नेता हुन्', स्टोक्सले भने।
यसक्रममा उनले केनको व्यक्तित्वको खुलेर तारिफ गरे।
'उनी हर स्थितिमा विनम्र र सहानुभूति देखाउछन्। उनी परिपूर्ण छन्। उनलाई देख्दा न्युजिल्याण्डबासी हुनु के हो देखाउँछ। उनी यस अवार्डका असली हकदार हुन्। न्युजिल्याण्डले उनलाई समर्थन गर्नेछ। उनी यसका हकदार हुन् र मेरो भोट पनि उनैलाई छ', उनले भने।
