आइसिसी टी-२० विश्वकप एसिया छनोट प्रतियोगिताको 'हाई स्कोरिङ' खेलमा कुवेतले कतारलाई शुक्रबार १० रनले पराजित गरेको छ।
सिंगापुरमा जारी प्रतियोगितामा टस हारेर पहिले ब्याटिङ गरेको कुवेतले २० ओभरमा ७ विकेटको क्षतिमा १९७ रन जोड्यो।
आक्रमक रुपमा उत्रिएको कुवेताका लागि ओपनर सन्दरुवानले १३ बलमा ४ चौका र १ छक्काको मद्दतमा २६ र उनका ओपनिङ पार्टनर मिट भाव्सरले ३० बलमा ४ चौका हिर्काएर ३५ रन बटुले।
एडनान इड्रेसले ३२ बलमा ५६ रन जोडे। उनले ८ चौका र २ छक्का प्रहार गरे। कप्तान मुहमद कसिफले २० बलमा ४३ रन र उस्मान वसिडले १८ बलमा २८ रनको योगदान दिए। बलिङमा कतारका नउमान सरवार र इकवाल हुसेनले २–२ विकेट लिए।
१९८ रनको रन पछ्याएको कतारले २० ओभरमा ५ विकेटको क्षतिमा १८७ रन जोड्यो। अन्तिम ओभरमा जितका लागि ३१ रन चाहिएको कतारले ३ चौका र १ छक्का प्रहार गरेको थियो। अन्तिम ओभरमा उसले २० रन जोडेको थियो।
कतारका लागि कप्तान तमूर साजिदले नटआउट ४६ रन जोडे। उनले ३२ बलमा ३ चौका र २ छक्का हिर्काए।
नउमान सरवारले १३ बलमा ६ चौका र १ छक्का हिर्काउदा ३४ रन बटुले। ओपनर फैसल जावेदले ८ बलमा २४ रन जोडे। उनले ३ चौका र २ छक्का प्रहार गरे।
बलिङमा कुवेतका जन्डु हमन्ड र सिराज खानले २–२ विकेट लिए।
खेलको दुवै इनिङमा गरी ४१ चौका र १५ छक्का प्रहार भएको थियो। जसमा कुवेतका खेलाडीले कुल २१ चौका र ९ छक्का हिर्काए। यस्तै कतारका खेलाडीले २० चौका र ६ छक्का प्रहार गर्दा खेल रोमाञ्चक बन्यो।
जारी प्रतियोगितामा कुवेतको यो पहिलो जित हो। सिंगापुरविरुद्धको खेल वर्षाले प्रभावित हुँदा १ अंक जोडेको कुवेत पहिलो खेलमा मलेसियासँग पराजित भएको थियो। कतारको भने ३ खेलमा दोस्रो हार हो। नेपाललाई पराजित गरेको कतार पहिलो खेलमा सिंगापुरसँग पराजित भएको थियो।
३ अंक जोडेको कुवेत अंक तालिकाको दोस्रो स्थानमा उक्लिएको छ। अब कुवेतले आफ्नो अन्तिम खेलमा नेपालसँग शनिबार खेल्नेछ। नेपालले भने आफ्नो अन्तिम खेल आइतबार सिंगापुरसँग खेल्नेछ। यी दुवै खेल जिते नेपाल शीर्ष स्थानमा रहेर विश्व छनोटमा पुग्नेछ।
