आइसिसी टी-२० विश्वकप छनोटको च्याम्पियन बन्दै आयोजक सिंगापुर आक्टोबरमा युएईमा हुने विश्व छनोटमा पुगेको छ।
सिंगापुरले आइतबार भएको महत्वपूर्ण खेलमा नेपाललाई ८२ रनले पराजितगर्यो। जससँगै सिंगापुर च्याम्पियन बन्न सफल भयो भने नेपालको विश्वकप सपना टुट्यो।
नेपाललाई पनि विश्व छनोटमा पुग्न जितको आवश्यकता थियो। तर हारले नेपाल तेस्रो स्थानमा सीमित बन्यो।
आयोजक सिंगापुरले अपराजित बन्ने क्रममा ७ अंक जोड्यो। २ खेलमा जित हात पारेको कतार ४ अंक जोडेर दोस्रो भयो।
४ अंक जोडेको नेपाल रनरेटमा पछि पर्दै तेस्रो स्थानमा सीमित बन्यो।
नेपाल पहिलो खेलमा कतारसँग पराजित भएको थियो। दोस्रो खेलमा मलेसिया र तेस्रो खेलमा कुवेतलाई पराजित गरेर नेपालले विश्व छनोटमा पुग्ने आसा जीवित राखेको थियो।
अन्तिम खेलमा सिंगापुरसँग पराजित भएपछि नेपालको विश्व छनोटमा पुग्ने सपना पूरा हुन सकेन।
नेपाल सन् २०१२ पछि विश्व छनोटमा पुग्न असफल भएको हो।
नेपालले सन् २०१२ भएको युएईमा भएको विश्व छनोट खेलेको थियो। त्यतिबेला नेपाल सातौ भएको थियो।
नेपालले सन् २०१३ को विश्व छनोटमा भने उत्कृष्ट खेलेको थियो। जहाँ नेपाल तेस्रो हुँदै सन् २०१४ को टी-२० विश्वकप पुगेको थियो।
सन् २०१५ को विश्व छनोटमा भने नेपालको प्रदर्शन राम्रो हुन सकेन। आयरल्यान्ड र स्कटल्यान्डमा भएको प्रतियोगितामा समूहको पुछारमा रहदै बाहिरिएको थियो।
विश्व छनोटमा १४ टिम
आगामी अक्टोबर ११ देखि ३ नोभेम्बरसम्म हुने आइसिसी टी–२० विश्वकप ग्लोवल छनोट प्रतियोगितामा १४ टिमको सहभागिता हुने छ।
प्रतियोगितामा आयोजक युएईसँगै १२ टिमको सहभागिता पक्का भइसकेको छ। गत संस्करणको विश्वकप खेलेका स्कटल्यान्ड, जिम्बावे, नेदरल्यन्ड्स, हङकङ, ओमान र आयरल्यान्ड वरीयतामा शीर्ष १० मा पर्न नसकेपछि टी–२० विश्वकप छनोटमा धकेलिएका थिए।
पपुवा न्युगिनीले पूर्वी एसिया प्यासेफिक क्षेत्रीय छनोट पार गरेर छनोट प्रतियोगितामा स्थान पक्का गरिसकेको छ। अफ्रिकाबाट केन्या र नामिबिया विश्व छनोटमा पुगेका छन्। एसियाबाट सिंगापुर र युरोपबाट जर्सीले विश्व छनोट खेल्नेछन्। अब अमेरिकाबाट २ टिम छनोट हुन बाँकी छ।
६ टिम पुग्नेछन् टी–२० विश्वकपमा
१४ टिमबीच आगामी अक्टोबरमा युएईमा हुने छनोटबाट शीर्ष ६ टिमले सन् २०२० मा अस्ट्रेलियामा हुने टी–२० विश्वकपमा स्थान पक्का गर्नेछन्। छनोट पार गरेर पुग्ने ६ टिम तथा बंगलादेश र श्रीलंकाबीच टी–२० विश्वकपको समूह चरणमा प्रतिस्पर्धा हुनेछ। समूह चरणबाट ४ टिम सुपर–१२ मा पुग्नेछन्।
सन् २०१८ को डिसेम्बरसम्म आइसिसीको टी–२० वरीयताको शीर्ष १० टिम टी–२० विश्वकपका लागि छनोट भइसकेका छन्। पाकिस्तानसहित भारत, इंग्ल्यान्ड, अस्ट्रेलिया, दक्षिण अफ्रिका, न्युजिल्यान्ड, वेस्ट इन्डिज र अफगातिस्तान वरीयताको शीर्ष ८ मा पर्दै सुपर–१२ का लागि सिधै छनोट भइसकेका छन्।
नवौं वरीयताको पूर्व च्याम्पियन श्रीलंका र दशौं वरीयताको बंगलादेश टी–२० विश्वकपका लागि छनोट भए पनि दुवैले समूह चरणमा छनोट प्रतियोगिताबाट आएका ६ टिमसँग खेल्नु पर्नेछ।