आइसिसी टी-२० विश्वकप एसिया छनोटमा तेस्रो स्थानमै सीमित बनेपछि अर्को वर्ष अस्ट्रेलियामा हुने विश्वकप खेल्ने नेपालको सपना अधुरै रह्यो।
आइतबार भएको निर्णायक खेलमा आयोजक सिंगापुरसँग८२ रनले पराजित भएपछि नेपाल तेस्रो स्थानमै सीमित बन्यो।
खेलमा सिंगापुरले उत्कृष्ट ब्याटिङ गरेर ६ विकेटको क्षतिमा १९१ रन जोड्यो। जवाफी ब्याटिङ गरेको नेपाल १५ ओभरमा १०९ रनमै अलआउट भएको थियो।
खेलपछि नेपालका कप्तान पारस खड्काले सिंगापुरको ब्याटिङको प्रशंसा गरे। तर नेपालले सोचे जस्तो ब्याटिङ गर्न नसकेको पारसको प्रतिक्रिया छ।
‘हामीले राम्रो क्षेत्रमा बलिङ गर्नुपर्ने कुरा एक स्थानमा छ। तर सिंगापुरले साँच्चै राम्रो ब्याटिङ गरेको हो। उनीहरूले उत्कृष्ट ब्याटिङ गरेर १९१ रन जोडे,’ पारसले प्रतिक्रिया दिए, ‘लक्ष्य भेट्टाउन सकिन्छ भन्ने सोचेका थियौं। हामीले गर्नुपर्ने जस्तो ब्याटिङ गर्न सकेनौं। हामीले सोचेको जस्तो केही भएन। प्रतियोगिताभर राम्रो क्रिकेट खेलेनौं। अगामी खेलहरूमा उत्कृष्ट पुनरागमन गर्ने आशा छ।’
उनले विश्व छनोटमा पुगेर उत्कृष्ट टिमसँग भिड्न १९२ रनको लक्ष्य भेट्टाउन सक्नुपर्ने पनि बताए।
उनले भने, ‘हाम्रो लागि ब्याटिङ राम्रो गर्नुको विकल्प थिएन। यदि विश्व छनोटमा पुग्नु छ भने हामी १९२ को लक्ष्य पार गर्न सक्ने हुनुपर्छ। तर दुर्भाग्य आज हाम्रो लागि राम्रो दिन थिएन।’
च्याम्पियन बनेर विश्व छनोटमा पुगेको सिंगापुरका लागि आइतबार ठूलो दिन भएको पारसले बताए।
‘राम्रो क्रिकेट खेलर विश्व छनोटमा पुगेको सिंगापुरका लागि यो ठूलो दिन हो,’ उनले भने।
उनले एसोसिएट टिमका खेलाडीले सधैं आफ्नो क्षमता विश्वास गर्नुपर्ने पनि बताए।
‘एसोसिएट क्रिकेटमा एकदिन धेरै दु:खी होइन्छ। तर भोलिपल्टै माथि पुग्न सकिन्छ। त्यसलै एसोसिएट टिमले सधैं स्थिर प्रदर्शन गर्न जरुरी छ। आफ्नो क्षमतामा विश्वास गर्नुपर्छ,’ पारसले भने।