वेस्ट इण्डिज भ्रमणमा रहेको भारतले भ्रमणको पहिलो खेलमा वेस्ट इण्डिजमाथि ४ विकेटको जित हासिल गरेको छ।
भारतको जीतमा बलरहरूको योगदान महत्वपूर्ण रहँदा ब्याटस्म्यानहरू भने आफ्नो स्वभाविक प्रदर्शनबाट चुके।
शनिबार अमेरिकामा सम्पन्न खेल ब्याटसम्यानहरूका लागि बिर्सनलायक रहेपनि भारतका लागि पहिलो अन्तराष्ट्रिय खेल खेलिरहेका बलर नवदीप सैनीका लागि भने अविस्मरणिय रह्यो। उनले उत्कृष्ट खेल पस्के।
डेब्यू खेलको पहिलो ओभरमा छक्का खाएपनि लगातार दुई विकेट लिदैं उनले वेस्ट इण्डिजको इनिङलाई धराशायी बनाए। उनले कुल ३ विकेट लिए।
त्यस्तै पारीको अन्तिम ओभरमा उनले नयाँ कीर्तिमानसमेत बनाए।
हिजोको खेलमा टोलीको अन्तिम ओभरको बलिङ गर्दै गर्दा सैनीको सामुन्ने थिए-किरोन पोलार्ड।
उनको ब्याटिङ चम्किरहेको थियो। यसरी चम्किरहेका किरोनलाई सैनीले भने एक रन पनि जोड्न नदिई एलबिडब्लु गराइदिए। यसका कारण अर्धशतकबाट बनाउन पोलार्ड मात्र १ रनले चुके। त्यसपछि ब्याटिङमा आएका थोमसलाई पनि सैनीले रन जोड्न दिएनन् र इण्डिजको पूरा इनिङ् ९५ मा समेटियो।
यसरी सैनी टि-२० खेलको अन्तिम ओभरमा मेडन फ्याँक्ने पहिलो भारतीय खेलाडी बने। अन्तराष्ट्रिय विश्व क्रिकेटमा यस्तो उनीबाहेक ३ खेलाडीले मात्र गरेका छन्। यो सूचिमा न्युजिल्याण्डका जीतन पटेल, पाकिस्तानका मोहम्मद आमिर र सिंगापुरका जनक प्रकाशमात्र रहेका छन्।
३ खेलाडीले यो काम गरिसकेको भएपनि नवदीप सैनी डेब्यू खेलमा यस्तो गर्ने पहिलो खेलाडी भएका छन्। आजसम्म कुनै पनि खेलाडीले आफ्नो डेब्यू खेलको अन्तिम ओभरमा मेडन बनाएको छैन्।
नवदीप भारतका फास्ट बलर हुन्। गत आईपिएलमा उनले १५० किलोमिटर प्रतिघण्टा भन्दा बढिको गतिले बलिङ गरेका थिए।