जिम्बावेले आगामी अक्टोबरमा युएईमा हुने टी-२० विश्वकप छनोट प्रतियोगिता खेल्न नपाउने भएको छ।
अन्तर्राष्ट्रिय क्रिकेट काउन्सिल (आइसिसी) ले निलम्बन गरेको कारण जिम्बावेले प्रतियोगितमा भाग नपाउने भएको हो।
आइसिसीले गत महिना जिम्बावे क्रिकेट बोर्डमाथि सरकारी हस्तक्षेत्र भएको भन्दै निलम्बन गर्नुका साथै आइसिसीका प्रतियोगिता खेल्न प्रतिबन्ध लगाएको थियो।
अब नाइजेरियाले जिम्बावेको स्थानमा टी-२० विश्वकप छनोट खेल्न पाउने भएको छ।
नाइजेरियसँगै युएई, हङकङ, आयरल्यान्ड, जर्सी, केन्या, नामिबिया, नेदरल्यान्ड्स, ओमान, पपुवा न्युगिनी, स्कटल्यान्ड, सिंगापुरले छनोट खेल्ने पक्का भइसकेको छ।
१४ टिमले भाग लिने प्रतियोगिताका लागि अमेरिका क्षेत्रबाट २ टिम छनोट हुन बाँकी छ।
नेपाल भने टी-२० विश्वकप एसिया छनोटमा सिंगापुरसँग पछि परेको थियो। जसका कारण नेपालले ८ वर्षमा पहिलो पटक विश्व छनोट प्रतियोगिता गुमाएको थियो।
नाइजेरियाले टी-२० विश्वकप अफ्रिका छनोटमा तेस्रो स्थानमा हात पारेको थियो। निलम्बनमा परेको जिम्बावे अफ्रिका क्षेत्रको टिम भएका कारण नाइजेरियालाई विश्व छनोटमा मौका दिइएको छ।
१४ मध्ये ६ टिम आगामी वर्ष अस्ट्रेलियामा हुने टी-२० विश्वकपमा छनोट हुनेछन्।
यता महिला टी-२० विश्वकप छनोटमा पनि जिम्बावेले खेल्न नपाउने भएको छ। जिम्बावेको स्थामा अब नामिबियाले खेल्नेछ।
महिलाको विश्व छनोट स्कटल्यान्डमा यहि महिना हुँदैछ। जहाँ नामिबियासँगै स्कटल्यान्ड, बंगलादेश, आयरल्यान्ड, नेदरल्यान्ड्स, पपुवा न्युगिनी, थाइल्यान्ड र अमेरिकाबीच प्रतिस्पर्धा हुँदैछ।
८ मध्ये शीर्ष २ टिम आगामी वर्ष अस्ट्रेलियामा हुने टी-२० विश्वकपमा पुग्नेछन्।
