ओमान क्रिकेटको आयोजनमा अक्टोबर ५ (असोज १८) देखि हुने टी-२० अन्तर्राष्ट्रिय प्रतियोगितामा नेपालले पहिलो खेल हङकङसँग खेल्ने भएको छ।
नेपाली क्रिकेट टिमका व्यवस्थापक रमन सिवाकोटीले प्रतियोगिताबारे पुष्टि गर्दै नेपालको खेल तालिका सार्वजनिक गरेका हुन्।
प्रतियोगितामा आयोजक ओमान, नेपाल, आयरल्यान्ड, हङकङ र नेदरल्यान्ड्सले प्रतिस्पर्धा गर्दैछन्।
प्रतियोगिता आइसिसी टी-२० विश्वकप छनोटको पूर्वसन्ध्यामा आयोजना गर्न लागिएको हो।
विश्व छनोटमा नेपाल छनोट हुन नसकेको अवस्थामा पनि आइसिसीले नेपाललाई प्रतियोगितामा भाग लिन अनुमति दिएको हो।
विश्व छनोट प्रतियोगिता अक्टोबर ११ देखि संयुक्त अरब इमिरेट्स (युएई) मा आयोजना हुँदैछ।
जहाँ स्टकल्यान्ड, जिम्बावे, नेदरल्यान्ड्स, हङकङ, ओमान, आयरल्यान्ड, युएई, पपुवा न्युगिनी, केन्या, नामिबिया, जर्सी र सिंगापुर छनोट भइसकेका छन्।
१४ देशको सहभागिता हुने विश्व प्रतियोगिताका लागि अमेरिका क्षेत्रबाट २ टिम छनोट हुन बाँकी छ।
नेपाल भने दुई साताअघि सिंगापुरमा भएको एसिया छनोटमै रोकिएको थियो। विश्व वरीयताको ११ औं स्थानमा रहेको नेपाललाई पछि पारेर सिंगापुरले एसियाबाट विश्व छनोटमा स्थान पक्का गरेको थियो।
ओमानमा हुने प्रतियोगितामा नेपालको खेल तालिका
नेपाल भर्सेस हङकङ ६ अक्टोबर
नेपाल भर्सेस नेदरल्यान्ड्स ७ अक्टोबर
नेपाल भर्सेस आयरल्यान्ड ९ अक्टोबर
नेपाल भर्सेस ओमान १० अक्टोबर