१३औं दक्षिण एसियाली खेलकुद (साग) का लागि महिला क्रिकेट टिमले बुधबारदेखि प्रशिक्षण सुरु गर्ने भएको छ। सागमा प्रतिस्पर्धा हुने २८ खेल मध्ये क्रिकेटको मात्र प्रशिक्षण सुरु हुन सकेको थिएन।
राष्ट्रिय खेलकुद परिषद्अन्तर्गत क्रिकेटका प्रमुख प्रशिक्षक जगत टमाटाका अनुसार बुधबारदेखि सुरु हुने महिला क्रिकेट टिमको तयारीमा ३५ जना खेलाडीलाई बोलाइएको छ।
प्रशिक्षण कीर्तिपुरस्थित त्रिभुवन विश्वविद्यालयको मैदानमा हुनेछ। महिला टिमको प्रशिक्षणको जिम्मा ५ जना प्रशिक्षकलाई दिइएको टमाटाको भनाइ छ।
महिलामा अन्य देशका पनि सिनियर टिमले नै खेल्ने टमाटाको भनाइ छ।
यता सागको पुरुष क्रिकेटमा नेपालको सिनियर टिमले खेल्ने टमाटाले बताए। यस्तै टेस्ट राष्ट्रहरु भारत, पाकिस्तान, बंगलादेश र श्रीलंकाको भने यु–२३ टिम सहभागी हुनेछन्। टिममा ३ जना सिनियर खेलाडी राख्न पाइनेछ।
उनले पुरुष टिमको प्रशिक्षणका लागि राष्ट्रिय टिमका व्यवस्थापक रमन सिवाकोटीलाई जनाकारी गराइसकेको बताए। प्रशिक्षक उमेश पटवाल भारतबाट आए लगत्तै अभ्यास सुरु हुने टमाटाको भनाइ छ। उनले पुरुषमा पनि सुरुमा ३५ खेलाडी नै सहभागी हुने जानकारी दिए।
नेपालले सागअघि ओमानमा हुने टी–२० अन्तर्राष्ट्रिय प्रतियोगिताका लागि तयारी गर्नेछ। सो प्रतियोगिताका लागि क्याम्प सुरु गर्न नेपालले आइसिसीसँग समन्वय गरिरहेको छ। तसर्थ ओमानमा हुने प्रतियोगिता र साग गेम्सको तयारी एकै पटक हुनेछ।
त्रिवि क्रिकेट मैदानमा क्रिकेट (पुरुष) को प्रतिस्पर्धा हुनेछ। पछिल्लो समय कीर्तिपुर मैदान बेवारिसे अवस्थामा छ। मैदानको घाँस काटिएको छैन भने पीच बिग्रिएको अवस्था छ। मैदानलाई असोज दोस्रो साताभित्र खेल्न योग्य बनाउने राखेपको तयारी छ।
मुलपानी मैदानमा सागको महिला क्रिकेट गर्ने तयारी छ। मुलपानीमा अहिलेकै अवस्थामा महिला क्रिकेट हुन असम्भव छ। पिचको अवस्था दयानीय छ भने मैदानमा खाल्डाखुल्डी छन्। यसअघि मुलपानी गत जेठमा प्राधनमन्त्री कप क्रिकेट प्रतियोगिता म्याट राखेर खेलाइएको थियो।
मुलपानी मैदान मर्मतका लागि कुनै प्रस्ताव नआएको निर्माण शाखाले जनाएको छ। मुलपानीमा क्रिकेट हुन नसकेको अवस्थामा पोखरामा खेल सार्ने राखेपको तयारी छ।