वेस्ट इन्डिजका रकीम कर्नवाल टेस्ट क्रिकेट खेल्ने विश्वकै बढी तौल भएका खेलाडी बनेका छन्। १४० केजीका रकीमले भारतविरुद्धको टेस्ट क्रिकेटमा डेब्यू गरेर विश्वकै बढी तौल भएको खेलाडीको रेकर्ड बनाएका हुन्।
जमैकाको किङ्ग्सटनको सविना पार्कमा शुक्रबार सुरु टेस्टमा उनले पहिलो दिन वेस्ट इन्डिजका लागि सबैभन्दा बढी ओभर बलिङ गरे।
यसअघि बढी तौल भएको खेलाडीको रेकर्ड अस्ट्रेलियाका वारविक आर्स्ट्रङ्गको नाममा थियो। उनी क्रिकेट खेल्दा १३३ देखि १३९ केजीसम्मका थिए।
अफ स्पिनर कर्नवालले भारतविरुद्धको डेब्यू खेलको पहिलो दिन २७ ओभर बलिङ गर्दा ६९ रन दिए भने १ विकेट हात पारे। उनले चेतेश्वर पुजारालाई ६ रनमा क्याच आउट गरेका थिए।
२६ वर्षीय कर्नवाल पछिल्लो समय स्पिन बलिङमा आफ्नो प्रभाव देखाएसँगै राष्ट्रिय टिममा परेका हुन्। ६ फिट ६ फिट अग्ला कर्नवालले विपक्षी ब्याट्सम्यानलाई अप्ठ्यारो हुने वाउन्स बल फ्याँक्ने गर्छन्।
घरेलु क्रिकेटमा सन् २०१४ मा डेब्यू गरेका उनले ५५ पहिलो श्रेणीको खेल खेल्दा २६० विकेट लिनुका साथै २२ सय २४ रन बनाएका छन्। उनले ५पहिलो श्रेणीमा शतक समेत बनाएका थिए।
एन्टिगुवमा जन्मिएका उनले भारतविरुद्धको पहिलो टेस्टमा भने खेल्न पाएका थिएनन्।
यसअघि सन् २०१६ मा भारतले वेस्ट इन्डिज भ्रमण गर्दा कर्नवालले वार्मअप खेलमा पाँच विकेट लिएका थिए। त्यतिबेला उनले विराट कोहली, अजिन्का राहाणे र पुराजालाई आउट गरेका थिए। तर पछि उनी राष्ट्रिय टिममा भने पर्न असफल भएका थिए।
