अफगानिस्तानका पूर्व कप्तान मोहम्मद नबीले सोमबार टेस्ट क्रिकेटबाट संन्यास लिएका छन्।
बंगलादेशविरूद्धको टेस्ट अगाडि नै उनले संन्यासको घोषणा गरेका थिए।
सोमबार बंगलादेश अफगानिस्तानसँगको टेस्टमा पराजित भएको थियो। जितले गर्दा नबीको संन्यास सुखद् रह्यो। अन्तिम टेस्टपछि उनलाई साथी खेलाडीले 'गार्ड अफ अनर' दिए।
टेस्टबाट संन्यास लिए पनि नबीले वान डे र टि-२० भने निरन्तर खेल्नेछन्।
३४ वर्षका नबीले अफगानिस्तानका लागि ३ टेस्ट खेलेका छन्। अफगानिस्तानले पनि हालसम्म ३ टेस्ट नै खेलेको छ।
संन्यास लिएका नबीले टेस्टमा भने खासै प्रदर्शन गर्न सकेनन्।
उनले ३ खेलमा केवल ३३ रन जोडे। यसक्रममा उनको सर्वाधिक स्कोर २४ रह्यो। ब्याटिङमा नजमेपनि बलिङमा भने उनको प्रदर्शन राम्रो रह्यो। उनले कुल ८ विकेट लिए।
अफगानिस्तानका लागि १८ वर्ष खेलेका मोहम्मद नबी देशको पहिलो वान डे तथा टि-२० टोलीमा समेत सामेल थिए।
उनले १२१ वान डेमा २ हजार ६ सय ९९ रन बनाएका छन् भने १२८ विकेट लिएका छन्।
यसका अलावा टि-२० क्रिकेटमा ६८ खेल खेलेका उनले १ हजार १ सय ६१ रन जोडेका छन्। यसक्रममा उनले ६९ विकेट लिएका छन्।
