क्यारेबियन प्रिमियर लिग (सिपिएल) मा नेपालका युवा लेग स्पिनर सन्दीप लामिछानले बार्बाडोस ट्रिडेन्सका लागि २ विकेट लिएका छन्।
मंगलबार विहान सकिएको खेलमा सन्दीपले जमैका तलावहाजविरुद्ध २ विकेट लिएका हुन्। यद्यपी खेलमा जमैकाले बार्बाडोसलाई ५ रनले पराजित गरेको छ।
पहिले ब्याटिङ गरेको जमैका २० ओभरमा १२७ रनमै अलआउट भयो। उसका लागि ग्लेन फिलिप्सले सबैभन्दा बढी ४१ रन जोडे। बलिङमा बार्बाडोसका सन्दीप, जासन होल्डर र राइमोन रेइफेरले २–२ विकेट लिए।
कसिलो बलिङ गरेका सन्दीपले ४ ओभरमा १७ रन दिँदा १० बल डट फ्याँकेका थिए। खेलमा सन्दीपले कुनै बाउन्ड्री दिएनन्।
१२८ रनको लक्ष्य पछ्याएको बार्बाडोसले ९ विकेटको क्षतिमा १२२ रन मात्र जोड्न सक्यो। उसका लागि जोनसन चाल्सले सबैभन्दा बढी ३१ रन जोडे। सन्दीप लामिछानेले ८ बलमा नटआउट ९ रन जोडे।
लिगमा ६ खेल खेलेको बार्बाडोस ४ अंकसहित चौथो स्थानमा छ।
सन्दीपले जारी लिगमा लगातार ६ खेल खेल्दै ८ विकेट लिइसकेका छन्।
