त्रिकोणीय टी-२० अन्तर्राष्ट्रिय सिरिजका लागि नेपाली राष्ट्रिय क्रिकेट टिम सिंगापुर पुगेको छ। एक महिनाअघि नेपाली टिमका लागि सिंगापुर यात्रा पीडादायी थियो। आइसिसी टी-२० विश्वकपको एसिया छनोटमा नेपाल तेस्रो स्थानमा सीमित बन्दा विश्व छनोटमा पुग्ने अभियान असफल भएको थियो।
विश्व छनोटमा पुग्न नसकेको नेपालको भन्दा ठूलो पीडा त जिम्बावेलाई पर्यो। अन्तर्राष्ट्रिय क्रिकेट काउन्सिल (आइसिसी) ले आन्तरिक विवादका कारण जिम्बावे क्रिकेटलाई तीन महिनाका लागि निलम्बन गरिदियो र आइसिसीका प्रतियोगितामा भाग लिनबाट बञ्चित हुने निर्णय गर्यो।
नेपाल र जिम्बावे विश्व छनोट खेल्नबाट बञ्चित भएको महिना नै हो सिंगापुरले पहिलो पटक विश्व छनोटमा पुगेर ऐतिहासिक सफलता हात पारेको। निर्णायक खेलमा नेपाललाई हराएर सिंगापुरले दुई सातापछि युएईमा हुने विश्व छनोटमा स्थान बनाएको थियो।
सिंगापुरले विश्व छनोटको तयारी भने नेपाल र जिम्बावेसँग खेलेर गर्दैछ। विश्व छनोट खेल्न बन्चित उच्च वरीयता टिमद्वय जिम्बावे र नेपाल सम्मिलिन त्रिकोणीय सिरिज खेल्नु सिंगापुरका लागि उपलब्धि हुन सक्छ।
सिरिजको पहिलो खेलमा शुक्रबार नेपाली समयअनुसार साँझ सवा पाँच बजे नेपाल र जिम्बावेबीच खेल हुँदैछ।
टी-२० अन्तर्राष्ट्रिय खेलमा नेपाल र जिम्बावेबीच पहिलो पटक प्रतिस्पर्धा हुन लागेको हो। एकदिवसीय खेलमा भने नेपाल र जिम्बावेबीच १८ महिनअघि प्रतिस्पर्धा भएको थियो। जिम्बावेको बुलावायोमा २०१८ को मार्च ४ मा एकदिवसीय विश्वकप छनोट अन्तर्गत भएको खेलमा जिम्बावेले नेपाललाई ११६ रनले पराजित गरेको थियो।
पहिले ब्याटिङ गरेको उसले ३८० रन जोडेको थियो। खेलमा सिकन्दर राजा र ब्रेन्डन टेलरले शतक प्रहार गरेका थिए। नेपालले ८ विकेटको क्षतिमा २६४ रन जोडेको थियो। जिम्बावेविरुद्ध शरद भेषवाकार र आरिफ शेखले अर्धशतक प्रहार गरेका थिए।
त्यतिबेला नेपालविरुद्ध खेलेका अधिकांस खेलका अहिले जिम्बावेको टिममा छैन। आइसिसीको प्रतिबन्धमा परेपछि सिरिजमै सीमित बनेको जिम्बावे बंगलादेशमा त्रिकोणीय सिरिज खेलेर सिंगापुर पुगेको हो। सिरिजमा जिम्बावेले बंगलादेशविरुद्ध दुवै खेलमा पराजित हुँदा अफगानिस्तानविरुद्ध खेल जित र एक हार बेहोरेको थियो।
नेपाल सिंगापुरमा प्रतिस्पर्धा गरेपछि उतैबाट ओमान जानेछ।
ओमान हुने प्रतियोगितामा आयोजक ओमान, नेपाल, आयरल्यान्ड, हङकङ र नेदरल्यान्ड्सले प्रतिस्पर्धा गर्दैछन्।
दुवै सिरिजमा गरी नेपालले ८ वटा टी-२० अन्तर्राष्ट्रिय खेल खेल्नेछ।
नेपाली टिम
पारस खड्का, दीपेन्द्रसिंह ऐरी (उपकप्तान), सोमपाल कामी, करण केसी, विनोद भण्डारी, सन्दीप लामिछाने, सन्दीप जोरा, ललितनारायण राजवंशी, पवन सर्राफ, अभिनास बोहरा, कुशल मल्ल, आरिफ शेख, रोहितकुमार पौडेल, सुसन भारी, इशान पाण्डे।
सिंगापुरमा नेपालको खेल तालिका
असोज १० गते नेपाल भर्सेस जिम्बावे
असोज ११ नेपाल भर्सेस सिंगापुर
असोज १४ गते नेपाल भर्सेस जिम्बावे
असोज १५ गते नेपाल भर्सेस सिंगापुर
ओमानमा हुने प्रतियोगितामा नेपालको खेल तालिका
असोज १९ गते नेपाल भर्सेस हङकङ
असोज २० गते नेपाल भर्सेस नेदरल्यान्ड्स
असोज २२ गते नेपाल भर्सेस आयरल्यान्ड
असोज २३ गते नेपाल भर्सेस ओमान
