ऋषभ पन्तको ब्याटिङ वान डेमा लगातार फ्लप भइरहेको छ। फ्लप भएपनि उनले लगातार ब्याटिङको मौका पाइरहेका छन्।
योसँगै पूर्व क्रिकेटर तथा आम प्रशंसकले पनि पन्तको लगातार आलोचना पनि गर्दै आएका छन्।
सुनिल गावस्कर, ब्रायन लारा, विविएस लक्ष्मण जस्ता क्रिकेटरहरूले पन्तलाई पछिल्लो ब्याटिङ क्रममा खेलाउनुपर्ने सल्लाह दिदै आएका छन्।
यस्तोमा अस्ट्रेलियाका वरिष्ठ क्रिकेटरले पन्तलाई बच्चाको संज्ञा दिएका छन्।
'आखिर पन्तबाट गरिदैं आइएका गल्ती बाँकी क्रिकेटरको भन्दा कसरी अलग हुनसक्छ? यो ठूला मान्छेको क्रिकेट हो। मलाई थाहा छ, उनी युवा छन् तर यो सत्य उनले बुझ्नुपर्छ। उनले आफ्नो अफसाइड खेलमा सुधार ल्याउनु आवश्यक छ', अस्ट्रेलियाका क्रिकेटर डिन जोन्सले ट्वीट गर्दै भनेका छन्।
उनले यस्तो बताएपनि पूर्व भारतीय खेलाडी युवराज सिंहले ऋषभ पन्तको खराब लयको बचाउ गरेका थिए।
'ऋपभ पन्तलाई लिएर जस्ता कुराहरू भइरहेका छन्, उनी त्यसको हकदार छैनन्। यी सबैबाट बाहिर आउन उनलाई कप्तान विराट कोहली तथा प्रशिक्षक रवि शास्त्रीको साथ चाहिन्छ। यी दुबैले पन्तसँग कुरा गर्नुपर्छ र यस दबाबबाट निस्कन सहयोग गर्नुपर्छ', युवराजले केहि समय अगाडि भनेका थिए।
भारतीय राष्ट्रिय क्रिकेटले पंतलाई चौथो नम्बरमा परिक्षण गरिरहेको छ। यस ब्याटिङ क्रममा पंतले हालसम्म ८ खेल खेलिसकेका छन्। यी म्याचहरूमा उनले मात्र एकपटक ३५ रनको आँकडा पार गरेका छन्।
यस ब्याटिङ क्रममा उनको सर्वाधिक स्कोर ४८ रन छ।
यस्तै टि-२० मा पनि उनले ११ पटक यही ब्याटिङ क्रममा ब्याटिङ गरेका छन्। यी म्याचमध्ये सात म्याचमा उनले १० रनको आँकडा पनि छुन सकेका छैनन्।
पंतले हालसम्म भारतका लागि ११ टेस्ट, १२ वान डे र २० टि-२० वान डे खेलिसकेका छन्।