ओमानमा भइरहेको पाँच देशको टी-२० सिरिजको अन्तिम खेलमा नेपाल पराजित भएको छ। नेपाललाई बिहीबार भएको खेललमा घरेलु टिम ओमानले ६ विकेटले पराजित गरेको हो।
हारसँगै नेपाल सिरिजमा तेस्रो स्थानमा सीमित बन्यो। घरेलु टिम ओमान सबै खेल जितेर च्याम्पियन बन्दा ३ खेलमा जित हात पारेको आयरल्यान्ड दोस्रो बन्यो।
नेदरल्यान्ड्स एक खेल जितेर चौथो र सबै खेलमा पराजित हङकङ् पाँचौ स्थानमा रह्यो।
नेपालले पहिलो खेलमा हङकङ र दोस्रो खेलमा नेदरल्यान्ड्सलाई पराजित गरेको थियो। तेस्रो खेलमा आयरल्यान्ड हारेक नेपाल अन्तिम खेलमा ओमानविरुद्ध खराब ब्याटिङको सिकार बन्यो।
बिहीबार नेपालले दिएको ६५ रनको लक्ष्य ओमानले ११.५ ओभरमा ४ विकेटको क्षतिमा पूरा गर्यो।
सका लागि सुरज कुमारले ३० बलमा २ चौका र ३ छक्काको मद्दतमा नटआउट ४२ रन जोडे। त्यसअघि खावर अली ९ रन, एकिब इल्यास ०, आमिर खलिम ८ रन र नसीम खुसी १ रनमा आउट भए।
बलिङमा नेपालका करण केसीले २ विकेट लिए भने सन्दीप लामिछाने र सोमपाल कामीले १–१ विकेट हात पारे।
चार खेलमा ११ विकेट लिएका करण सिरिजको सर्वाधिक विकेट लिने बलर बने।
टी–२० अन्तर्राष्ट्रियमा नेपालको दोस्रो खराब स्कोर
त्यसअघि घरेलु टिम ओमानले टस जितेर फिल्डिङ रोजेपछि पहिले ब्याटिङ गरेको नेपाल ११ ओभरमा ६४ रनमै अलआउट भयो। यो स्कोर नेपालको टी–२० अन्तर्राष्ट्रियमा दोस्रो कम स्कोर हो।
नेपालको सबैभन्दा कम स्कोर भने ५३ रन हो। सन् २०१५ मा नेपाल आयरल्यान्डसँग झिनो योगफलमा समेटिएको थियो।
त्यतिबेला नेपाल १४.३ ओभरमा अलआउट भएको थियो। यसपटक ११ ओभरमा अलआउट भएर नेपालले अर्को खराब इतिहास बनायो।
ओमानविरुद्ध नेपालका २ ब्याट्सम्यानले मात्र दोहोरो अंकमा रन जोड्न सके। तेस्रो नम्बरमा ब्याटिङ गरेका आरिफ शेखले २० रन र दीपेन्द्रसिंह ऐरीले ११ रन जोडे।
आरिफले १३ बलमा २० रन र दीपेन्द्रले ६ बलमा ११ रन जोडे।
त्यसअघि ओपनर इशान पाण्डे २ रन र कप्तान पारस खड्का ५ रनमा आउट भएका थिए।
विनोद भण्डारी ४ रन, सन्दीप जोरा ०, सोमपाल कामी ८ रन, करण केसी ८ रन, सन्दीप लामिछाने २ रन र अभिनास बोहरा २ रनमा आउट भए।
बलिङमा ओमानका अमिर खलिमले ५ विकेट लिए। विलाल खानले २ विकेट लिए भने मोहमद नदीम र खावर अलीले १–१ विकेट हात पारे।
सिरिजको सुरुवाती २ खेलमा जित हात पारेको नेपाल अघिल्लो खेलमा आयरल्यान्डसँग हारेको थियो। कुवेतलाई फराकिलो अन्तरले हराए मात्र नेपालले सिरिज जित्ने सम्भावना हुनेछ।
