दोस्रो टेस्टमा दक्षिण अफ्रिकामाथि सानदार जित निकाल्दै भारतले तीन खेलको सिरिज कब्जा गरेको छ।
पुनेमा आइतबार भारतले दक्षिण अफ्रिकालाई एक इनिङ र १३७ रनले पराजित गर्दै सिरिजमा २-० को अग्रता लिएको हो।
भारतले घरेलु मैदानमा लगातार ११औं सिरिज जित्दै कीर्तिमान समेत बनाएको छ।
फलोअनमा परेको दक्षिण अफ्रिका आइतबार दोस्रो इनिङमा १८९ रनमै अलआउट भयो। अन्तिम ८ बलमा ३ विकेट गुमाएको दक्षिण अफ्रिकाका लागि दोस्रो इनिङमा इल्गरले सबैभन्दा बढी ४८ रन जोडे। इनिङमा दक्षिण अफ्रिकाका ७ ब्याट्सम्यान दोहोरो अंकमा रन जोड्न नपाइ आउट भए।
बलिङमा भारतका रविन्द्र जडेजा र उमेश यादवले ३-३ विकेट लिए। रविचन्द्रन आस्विनले २ विकेट हात पारे।
त्यसअघि दक्षिण अफ्रिका पहिलो इनिङमा २७५ रनमै अलआउट हुँदा फलोअनमा परेको थियो। दक्षिण अफ्रिकाका लागि कप्तान फाप डुल प्लेसिसले सबैभन्दा बढी ६४ रन जोड्दा बलिङमा भारतका आस्विनले ४ र उमेशले ३ विकेट लिए।
पहिले ब्याटिङ गरेको भारतले ५ विकेटको क्षतिमा ६०१ रन बनाउदा इनिङ समाप्तीको घोषणा गरेको थियो। भारतका लागि कप्तान विराट कोहलीले दोहोरो शतक बनाउने क्रममा नटआउट २५४ रन जोडेका थिए। यस्तै ओपनर मयंक अग्रवालले १०८ रनको योगदान दिएका थिए।
