वुमेन्स च्याम्पियन्स लिग (डब्लूसिएल) टी-२० क्रिकेट प्रतियोगितामा क्याट क्विन्स काठमाडौंले पहिलो जित हात पारेको छ।
काठमाडौंले बिहीबार भएको खेलमा पोखरा पल्टन्सलाई ८२ रनको फराकिलो अन्तरले पराजित गर्यो।
पहिले ब्याटिङ गरेको काठमाडौंले कप्तान रुबिना क्षेत्रीको अर्धशतकमा ५ विकेटको क्षतिमा १५२ रन जोड्यो। रुबिनाले आकर्षक ब्याटिङ गर्ने क्रममा ६७ बलमा १४ चौका र २ छक्का हिर्काउदै नटआउट ८३ रन जोडिन्।
बलिङमा पोखराकी अनुराधा चौधरीले ४ विकेट हात पारिन्।
१५३ रनको लक्ष्य पछ्याएको पोखरा १६.५ ओभरमा ७० रनमा अलआउट भयो। उसका लगि कप्तान सीता रानामगरले सबैभन्दा बढी १७ रन जोडिन्।
बलिङमा काठमाडौंकी सरस्वती चौधरी र अप्सरी बेगमले २-२ विकेट लिए।
यसअघि बुधबार भएको पहिलो खेलमा काठमाडौंलाई चितवन राइनोजले ५ विकेटले हराएको थियो।
