वुमेन्स च्याम्पियन्स लिग (डब्लुसिएल) टी–२० क्रिकेट प्रतियोगितामा चितवन राइनोजले लगातार दोस्रो जित हात पारेको छ।
चितवनले शुक्रबार भएको खेलमा ललितपुर फाल्कोन्सलाई ८९ रनको फराकिलो अन्तरले पराजित गरेको हो।
ललितपुरको यो दोस्रो हार हो।
यसअघि लतिपुरलाई विराटनगर टाइटन्सले पराजित गरेको थियो। चितवनले भने क्याट क्विन काठमाडौंलाई हराएको थियो।
टस हारेर पहिले ब्याटिङ गरेको चितवनले २० ओभरमा ३ विकेटको क्षतिमा १३५ रन जोड्यो।
चितवनका लागि ऋतु कनौजियाले नटआउट ५८ रन जोडिन्। उनले ५५ बलमा ८ चौका हिर्काइन्। कप्तान इन्दु बर्माले १० रन र प्यारी चौधरीले नटआउट २२ रन बटुलिन्। उनले २३ बलमा १ चौका हिर्काए।
बलिङमा ललितपुरकी नेरी थापाले २ विकेट लिइन्।
१३६ रनको लक्ष्य पछ्याएको ललितपुर १७.१ ओभरमा ४६ रनमै समेटियो। ललितपुरका लागि कप्तान नेरी थापाले १७ रन जोड्नु बाहेक अन्य ब्याट्सम्यानले दोहोरो अंकमा रन बटुल्न सकेनन्।
ललितपुरको इनिङ ध्वस्त पार्ने क्रममा चितवनकी कविता गौतमले ३ विकेट र ऋतुले २ विकेट हात पारे।
जारी प्रतियोगितामा पाँचै वटै टिमले २–२ खेल खेल्दा चितवन र विराटनगरले दुवै खेल जितेका छन्। काठमाडौं एक खेलमा विजयी हुँदा ललितपुर र पोखरा पल्टन दुवै खेलमा पराजित भएका छन्।
.jpg)
.jpg)
.jpg)
